Bjellorusi rezultatet e para

Ashtu siç dhe pritej farsa e zgjedhjeve ne Bjellorusi nuk ka dhënë ndonjë rezultat ndryshe. Asnjë përfaqësues i opozitës politike në Bjellorusi nuk është zgjedhur në parlament në zgjedhjet legjislative të së dielës. Ky konstatim bazohet në rezultatet paraprake të dhëna nga Komisioni Qendror i Zgjedhjeve. 109 deputetë u zgjodhën me shumicë të qartë.
Një vend do të kontestohet në raundin e dytë, pasi asnjë kandidat nuk ka siguruar votat e nevojshme prej 50 për qind. Parlamenti i ri do të përfshijë tre deputetë nga Partia Komuniste e Bjellorusisë dhe një nga Partia Agrare, që të dy këto parti udhëhoqën një platformë në mbështetje të presidentit Aleksandër Lukashenko. Shumica e partive opozitare tërhoqën kandidatët e tyre dhe i bënë thirrje votuesve që të qëndrojnë larg nga qendrat e votimit. Zyrtarisht, pjesëmarrja ishte 74.3 për qind. Organizata për Siguri dhe Bashkëpunim në Evropë ka dërguar rreth 300 vëzhgues për të monitoruar zgjedhjet dhe do të japë vlerësimin të hënën. Me pare vëzhguesit ndërkombëtare janë shprehur se Bjellorusia nuk njeh zgjedhje te lira dhe të ndershme që prej kohës kur presidenti Aleksandër Lukashenko erdhi në pushtet në vitin 1994.