Trajneri i Francës beson te forca e sulmit të tij për ndeshjen kundër luanëve, por nuk është euforik

Trajneri i Francës, Lorent Blank, duket se e sheh mbrojtjen e skuadrës angleze, kundër së cilës do të luajë të hënën, si pikën më të dobët për shkak të mungesës së Ferdinand, por ka qenë i sinqertë kur ka thënë se edhe Franca ka një mungesë po aq të rëndësishme, pasi do të mungojë Jan MVila.

“Çdo skuadër ka problemet e veta”, ka thënë Blank. “Edhe ne kemi problemet tona. Anglia ka disa dëmtime, sidomos në mbrojtje. Ata nuk janë në kulmin e forcës, por ajo që më shqetëson është se Anglia do të luajë një stil të caktuar.

Duhet të jemi shumë të fortë fizikisht kundër tyre, prandaj do të jetë një ndeshje shumë e vështirë. Anglia do të japë gjithçka në fushë sepse kur luan Franca kundër Anglisë, nuk kemi thjesht një ndeshje mes dy përfaqësuesesh.

Por nuk i kemi frikë më shumë se skuadrat e tjera. Ne e dimë se kemi një sulm mjaft të mirë. Në tri ndeshjet e fundit Riberi është kthyer në formën e vet më të mirë. Karim Benzema është një tjetër lojtar shumë i mirë. Në eliminatore kishim një mbrojtje shumë të mirë dhe shpresoj të vazhdojmë kështu edhe me ndeshjen e parë.

Polemika Trajneri i Francës ka rindezur polemikat në lidhje me mungesën e Rio Ferdinandit në Euro 2012, duke kritikuar haptazi vendimin e trajnerit anglez, Roi Hodgson, se përjashtimi i Ferdinand ishte bazuar në arsye futbollistike.

Vëllai i Ferdinandit, Anton, dyshohet se është abuzuar vitin që shkoi me sharje raciste nga mbrojtësi i përfaqësueses angleze, Xhon Terri, akuza të cilat lojtari i Çelsit i mohon.

Mbrojtësi i Mançester Junajtid, Rio, dyshohet se është lënë jashtë përfaqësueses për shkak të frikës se mos mospajtimet e tij me Terrin do të përçanin Anglinë.

Ferdinand i kishte thënë Hodgsonit se donte të luante në Euro 2012, por u la jashtë në favor të mbrojtësve të tjerë, Terri, Leskot, Xhons, Jagielka dhe i riu i Liverpulit, Kelli. Blank me kënaqësinë më të madhe e ka rihapur këtë çështje dhe nuk ka hezituar të dalë në mbrojtje të ish-shokut të tij të skuadrës te Mançester Junajtid.

Trajneri francez ishte edhe më provokues kur hodhi poshtë publikisht shpjegimin “vendim i kulluar sportiv”, që Hodgson ka dhënë për lënien jashtë të Ferdinand.

“E njoh shumë mirë Rio Ferdinandin dhe është e vërtetë se arsyeja përse u la jashtë përfaqësueses nuk ka të bëjë me futbollin”, ka thënë Blank. “Është e qartë se ka gjëra të tjera. Mendoj se Rio Ferdinand është një lojtar shumë i mirë, edhe pse është pranë fundit të karrierës si futbollist.

Ishte befasuese për mua të shihja se ai nuk zgjodh, pavarësisht dëmtimeve që ka skuadra e Anglisë në mbrojtje. Nuk është puna ime, në fund të fundit, dhe nuk më takon të merrem me këtë gjë dhe nuk dua të komentoj shumë për problemet që ka Anglia.

Unë nuk jam trajneri i Anglisë dhe nëse ai ka marrë këtë vendim, e ka marrë sepse e sheh si më të mirin për veten e tij.”