Bode: Gara për PD-në e Tiranës, e hapur

Nxehet gara dhe shtohen rivalët për kreun e PD-së, Tiranë. Sekretari i përgjithshëm i selisë blu, Ridvan Bode, sqaron se i ka kthyer përgjigje për garën të gjithë deputetëve apo kandidatëve që e shikojnë veten në garë për kreun e PD-së së kryeqytetit. Megjithëse është Kryeministri Sali Berisha ai që do të merret drejtpërdrejtë me garën në Tiranë dhe Durrës, strukturat e PD-së janë vënë në lëvizje për zëvendësuesin e Sokol Olldashit në Tiranë. Sekretari i përgjithshëm i PD-së, Ridvan Bode, pohoi se ka marrë letrën e kandidatit demokrat për Tiranën, Besnik Mustafaj, që parashtron kërkesat e tij për kandidim. Bode sqaron se i ka kthyer përgjigje në bazë të rregullores dhe statutit që përcakton partia, çdo kandidati. Bode thekson se "më kanë ardhur shumë letra, e-maile etj., i kam kthyer të gjithëve përgjigje, nuk shoh asnjë argument se përse letra e zotit Mustafaj të vlerësohet ndryshe". Sekretari i përgjithshëm i Partisë Demokratike nuk preferoi t‘i japë emrat e njerëzve që kanë aplikuar për PD-në e Tiranës, por tha se mes tyre ka edhe emra të pa bërë ende publikë. Deri tani, në garë janë Besnik Mustafaj, Edi Paloka dhe Gjergji Bojaxhi.