Borchardt: Keni ende punë për liberalizimin e vizave

“Shqipëria ka ende pune që të provojë se është e denjë për të pasur një sistem të lire vizash”, tha ambasadori gjerman, Berndt Borchardt, në një aktivitet të organizuar nga G99 dhe European Stability në Universitetin Evropian të Tiranës.

Gjatë këtij aktiviteti, u treguan dy filma dokumentarë mbi zhvillimet e dy vendeve ballkanike në tranzicion: Shqipëria dhe Bosnja.

 Duke folur mbas filmit për Shqipërinë, ambasadori gjerman, Borchard, rekomandoi qeverinë shqiptare të angazhojë faktorë të huaj në përmirësimin e standardeve të kufijve.

Përfaqësuesi i ESI, Gerald Knauss, rekomandoi që Shqipëria mos të mbetet prapa vendeve fqinje dhe të aplikojë për statusin e vendit kandidat në BE përpara dhjetorit të 2008, përndryshe do të mbetet përsëri e fundit në listë.

“Shqipëria ka një problem imazhi”, tha Knauss, një imazh i cili e mban peng edhe pas vendeve si Serbia, të cilat në fakt kanë votuar për parti antievropiane në shumicë. Erion Veliaj, ritheksoi angazhimin e plotë të G99 për të lobuar intensivisht në krah të gjithë aktorëve që dëshirojnë të përshpejtojnë proceset integruese të vendit.

Politikat aktuale të qeverisë “Berisha” janë duke e larguar vendin nga ecuria normale e zhvillimit dhe po e mbajnë larg BE-së”, tha Veliaj, por kjo nuk duhet të na dekurajojë, përkundrazi tani duhet të mbledhim forcat që të ecim në të njëjtin ritëm me aktorët e tjerë në rajon.