Brazil, identifikohen 11 trupat e Air France

Zyrtarët në Brazil kanë identifikuar 11 trupat e parë nga 50 viktimat e gjetura në ujërat e Atlantikut, pas rrëzimit të avionit të linjës Air France, tragjedi e cila provokoi vdekjen e 228 personave që ndodheshin në bordin e avionit. Gati tre javë pas rrëzimit mbi oqeanin Atlantik të avionit francez me pasagjerë është bërë i mundur deri tani identifikimi i dhjetë brazilianëve dhe një tjetër personi, shtetas i huaj, bëjnë të ditur autoritetet braziliane. Gjashtë burra dhe pesë gra janë identifikuar në bazë të gishtave dhe dhëmbëve. Deri tani nga kërkimet e bëra janë gjetur gjithsej 50 kufoma. Airbus i agjensisë ajrore të fluturimit Air France, u rrëzua më 1 qershor me 228 njerëz në bord ndërsa kishte nisur udhëtimin nga Rio de Janeiro për në Paris. Ndër të vdekurit ishin edhe 28 gjermanë. Shkaqet e rrëzimit të avionit ende nuk janë bërë të ditura. Airbus A330 përfundoi në ujërat e thella të oqeanit Atlantik në 1 qershor, ndërsa nuk është gjetur ende regjistruesi i të dhënave, dhe për pasojë shkaku i rrëzimit mbetet një mister. Në vendin e ngjarjes vazhdojnë kërkimet ndërsa ndihma të specializuara kanë ardhur edhe nga vende të tjera. Ndërkaq kufomat janë dërguar në morgun e Recifes në Brazil për të vijuar me procedurat e domosdoshme. Spekulimet ne lidhje me atë se çfarë mund të ketë shkaktuar rrëzimin e avionit, vazhdojnë të përqëndrohen në problemin që mund të kenë patur sensorët e shpejtësisë ,që njihen ndryshe me emrin tubat Pitot. Nga burimet zyrtare mësohet se nga avioni janë regjistruar parregullsi lidhur me shpejtësinë para se te humbiste kontakti me mjetin fluturues.