Budapesti, votë “pro” statusit kandidat të Shqipërisë
Zëvendësministrja e Punëve të Jashtme, Edit’h Harxhi zhvilloi një vizitë dy ditore në Hungari
Në festimet e 100-vjetorit të Pavarësisë së Shqipërisë, Hungaria do të përfaqësohet me Kryeministrin Viktor Orban. Ndërsa në ceremoninë e rivarrosjes së Familjes Mbretërore shqiptare, Hungaria do të përfaqësohet në nivelet më të larta, pasi e konsideruar si një aset me vlerë figurën e Mbretit Zog dhe Mbretëreshës Xheraldina, pasardhëse e familjes hungareze Aponyi
Zv/Ministrja e Punëve të Jashtme, znj. Edit’h Harxhi zhvilloi një vizitë pune në Budapest në datat 10-12 tetor 2012, me ftesë të homologut hungarez, Sekretarit të Shtetit në MPJ-në e Hungarisë, z. Zsolt Nemeth. Gjatë kësaj vizite znj. Harxhi zhvilloi takime me Sekretarin e Shtetit në MPJ-në hungareze, Zsolt Nemeth, Zv/Sekretaren e Shtetit për Minoritetet, Zhurzhana Repash, Zv/Sekretarin e Shtetit për Politikat, Peter Sztaray, dhe Zv/Sekretarin e Shtetit për Marrëdhëniet me BE-në, Balint Odor.
Në takimet e zhvilluara u diskutua mbi marrëdhëniet shumë të mira mes dy vendeve dhe perspektivën e zhvillimit të tyre. Gjithashtu u përshëndet progres raporti i Komisionit Evropian, i cili rekomandoi dhënien e statusit të vendit kandidat për Shqipërinë, duke u cilësuar si një arritje historike për popullin shqiptar, pas angazhimit dhe një pune intensive të qeverisë dhe institucioneve shqiptare për plotësimin e 12 prioriteteve, të mbështetur nga të gjithë faktorët ndërkombëtarë.
Harxhi falënderoi bashkëbiseduesit për ndihmën e çmuar që Hungaria i ka dhënë Shqipërisë në rrugën e integrimit evropian, duke nënvizuar se mirëpritet kontributi i Hungarisë në procesin e integrimit të vendit në BE. Një vend të rëndësishëm gjatë bisedimeve zuri edhe thellimi i marrëdhënieve ekonomike në fusha me interes të përbashkët dhe rritjen e investimeve.
Në këtë kuadër, palët u angazhuan për përshpejtimin e punës për mbledhjen e Komisionit të Përbashkët Ekonomik.
Sekretar i Shtetit, Zsolt Nemeth, nga ana e tij, garantoi për mbështetjen e plotë që Hungaria do t’i japë Shqipërisë për marrjen e statusit të vendit kandidat. Në vijim, ai informoi Harxhi se në festimet e 100-vjetorit të Pavarësisë së Shqipërisë, Hungaria do të përfaqësohet me Kryeministrin Viktor Orban dhe në ceremoninë e rivarrosjes së Familjes Mbretërore shqiptare, Hungaria do të përfaqësohet në nivelet më të larta, pasi e konsideruar si një aset me vlerë figurën e Mbretit Zog dhe Mbretëreshës Xheraldina, pasardhëse e familjes hungareze Aponyi. Vizita e Harxhit në Budapest pati vëmendjen e shtypit dhe medias hungareze. Harxhi dha një intervistë në Televizionin Duna TV, mbi integrimin evropian të Shqipërisë dhe marrëdhëniet shumë të mira ndërmjet dy vendeve.