“Bukuri e nëmur” flet në frëngjisht

Përmbledhja me poezi “Bukuri e nëmur” e poetit kosovar, Sali Bashota, i është ofruar edhe lexuesit zviceran. Libri, i cili në më 2006 u shpall më i miri në Mitingun e Poezisë në Gjakovë, është botuar në Cyrih. Shtëpia botuese “Xanthippe – Edition ASPASIA”, e ka botuar atë në frëngjisht. “Bukuri e nëmur”, i botuar në Kosovë në vitin 2006, është përkthyer nga Frederique Duversin. Poeti Sali Bashota është shprehur i kënaqur që libri i tij do të “flasë” edhe frëngjisht, duke shpjeguar se promovimi i “Bukur e nëmur” do të bëhet gjatë vitit të ardhshëm në Cyrih. “Është padyshim shumë e rëndësishme për mua, pasi edhe përkthyesja është shumë e njohur, por në të njëjtën kohë është edhe një afirmim për librin tim”, - ka thënë Bashota. Teksa ka thënë se “Bukuri e nëmur” deri më tani është përkthyer edhe në bullgarisht, ai ka shpjeguar se suksesi i librit është bazuar në temën që trajtohet në të.

“Interesimi për këtë libër ka qenë i madh nga botuesit e huaj, duke qenë se ka temën e dhimbjes personale, familjare, të vetmisë dhe luftën”, - ka thënë ai. Në parathënien e librit “Bukuri e nëmur” (Beauté maudite), që është shkruar nga Yvonne - Denise Kochil, thuhet se poeti përmes librit ka pasqyruar vlerat kombëtare.

“Poetët e çdo kombi synojnë t’i paraqesin vlerat e tyre kombëtare, por edhe vlerat universale të shoqërisë njerëzore. Prandaj, vlerat u takojnë të gjithë atyre që për mision e kanë humanizmin dhe lirinë e fjalës së vërtetë. Me poezitë e tij të mrekullueshme, Sali Bashota po e hap një dritare të shpirtit që e ka shkëlqimin dhe origjinalitetin e vet, duke fuqizuar fjalën poetike me dritën e tij të veçantë magjike”, - thuhet në parathënien e përmbledhjes së Bashotës botuar në frëngjisht.

Poezitë e Sali Bashotës janë përkthyer dhe botuar në anglisht, bullgarisht, frëngjisht etj. Autori është nderuar me çmime dhe shpërblime të larta letrare në Kosovë, Shqipëri, Maqedoni.