Bunjaku do të vazhdojë me Nurnbergun

E ardhmja e Albert Bunjakut do të jetë e lidhur me Nurnbergun. Sulmuesi kosovar iu rikthye golit gjatë fundjavës që shkoi, pas gati dy vjetësh dhe ky fakt i bëri drejtuesit e klubit të mendojnë që ta vazhdojnë bashkëpunimin me përfaqësuesin zviceran.

Menaxheri i klubit gjerman, Martin Bader, ia ka hapur dyert mundësisë së vazhdimit të kontratës me futbollistin gjilanas. “Nëse Alberti e mban formën dhe është mirë fizikisht, ne mund ta imagjinojmë vazhdimin e kontratës me të”, u shpreh zyrtari i lartë i klubit nga Bundesliga.

Kontrata e Bunjakut me Nurnbergun skadon në verën e vitit 2013, por atë e ka siguruar edhe trajneri Dieter Hecking se llogarit në të edhe në të ardhmen. “Trajneri më ka thënë se nuk duhet të brengosem për këtë punë”, tha 28 vjeçari.