Bush: Do tia dalim

Presidenti amerikan thotë se ekonomitë më të mëdha të botës do të bashkëpunojnë për të zgjidhur krizën financiare

Në takimet që zhvilluan në Uashington, ministrat e Financave dhe drejtuesit e bankave qendrore nga vendet e industrializuara dhe vendet në zhvillim miratuan planin për krizën financiare që ka shkaktuar bllokimin e tregjeve botërore të tregtisë. Presidenti amerikan, Xhorxh Bush, mori pjesë në disa nga seancat e diskutimeve të djeshme. Ai u takua me zyrtarët evropianë dhe japonezë në Shtëpinë e Bardhë në mëngjes dhe pasdite, dhe shkoi në takimin e ministrave të Financave të vendeve të zhvilluara dhe atyre në zhvillim. Në takimet e zhvilluara në Fondin Monetar Ndërkombëtar, zyrtarët e lartë të financave nga e gjithë bota miratuan planin e veprimit që u parashtrua të premten nga amerikanët, evropianoperëndimorët dhe japonezët, që përbëjnë grupin e shtatë vendeve më të industrializuara të botës. Në atë takim, të gjithë këto vende të pasura u zotuan të bashkëpunojnë për të shpëtuar bankat që ndodhen në prag të falimentimit dhe të sigurojnë fonde për rifillimin e dhënies së kredive. Një grup më i madh prej 24 vendesh, që përbëjnë komitetin drejtues të Fondit Monetar Ndërkombëtar e miratuan planin. Dominik Shtaus Kan, drejtori i FMN-së, tha se miratimi i planit përbën një arritje të madhe në fushën e bashkëpunimit global për zgjidhjen e asaj që është kthyer në krizën më serioze financiare në 50 vjet. “Ideja jonë ishte që të shkonin përpara dhe të binim dakord si një entitet i tërë për disa parime të përbashkëta. Por nuk ishte e qartë më parë nëse do t’ia arrinim me sukses kësaj. Prandaj jam shumë i kënaqur me këtë sukses kaq të madh në shkallë botërore”, - tha ai. Më parë, Shtraus Kan kishte shprehur shqetësime rreth përmasave të krizës, duke thënë se masat e mëparshme të mara nga evropianët dhe amerikanët për të parandaluar krizën nuk patën rezultat. Në një konferencë shtypi dje, Shtraus Kan u shpreh me optimizëm për masat e reja, që fituan mbështetjen edhe të vendeve të mëdha në zhvillim, si Kina, Brazili, Rusia dhe India, se këto masa do të sjellin stabilizimin e tregjeve. Javën e kaluar tregjet e aksioneve ranë nga 15 në 20 për qind, rënia më e madhe në 30 vjet. Presidenti amerikan, Xhorxh Bush, mori pjesë në disa nga seancat e diskutimeve të djeshme. Pas takimit të mëngjesit në Shtëpinë e Bardhë me ministra e Financave të vendeve të zhvilluara, Bush u zotua se do të bashkëpunojë ngushtë me to dhe tha se ekonomia botërore do të dalë më e fortë nga kriza: “Ne jemi në këtë situatë së bashku. Ne do ta kapërcejmë atë së bashku. Kam besim se ekonomitë e mëdha të botës do t’i përballojmë me sukses sfidat që kanë përballë”. Ministrat e Financave të vendeve të industrializuara e kishin planifikuar takimin e tyre në Uashington shumë më parë sesa luhatjet e mëdha të tregjeve javën e kaluar. Ata po marrin pjesë në takimin vjetor të Fondit Monetar Ndërkombëtar dhe të Bankës Botërore në Uashington. Por pjesëmarrja e paplanifikuar e Presidentit Bush në takimin e FMN-së vuri në dukje angazhimin e pjesëmarrësve për të zgjidhur krizën financiare. Sot, udhëheqësit evropianë do të mblidhen në Paris për të hartuar një plan të përbashkët për t’iu përgjigjur krizës financiare.