Chavez kthehet në Venezuelë

Chavez, 57 vjeç, ka qenë në Kubë për tri javë rresht, për të marrë mjekime për shkak të ringjalljes së kancerit, të cilin ai e kishte kuruar njëherë vitin e kaluar. Ai tha se po e merr veten, por se i duhej të bënte radioterapi.

Sëmundja e tij ka shkaktuar pasiguri politike në prag të zgjedhjeve presidenciale që mbahen në tetor, ku Chavez do të kërkojë të rizgjidhet.

Presidenti përshëndeti me dorë dhe qeshi teksa zbriste nga aeroplani në aeroportin ndërkombëtar të Karakasit, ku u prit nga ministrat e qeverisë.

“Ky është një kthim i ri, është një lutje e madhe, një këngë dashurie dhe në të njëjtën kohë një angazhim”, tha Chavez në një fjalim emocional të transmetuar në televizionin publik.

Ai gjithashtu akuzoi kundërshtarët e tij në mediat venezuelase se po përpiqen të shkaktojnë frikë dhe pasiguri në vend. “I bëj thirrje popullit që të ruajë qetësinë”, tha ai.

Më herët, presidenti kishte njoftuar kthimin e tij në Venezuelë përmes një porosie në rrjetin social Twitter. “Mirëdita, botë e mirë”, tha ai në njoftimin e shkurtër.