Cilësia e zgjedhjeve do ndikojë te shqyrtimi i aplikimitNga TemaPas deklaratës së ministrave të Jashtëm të Bashkimit Evropian se do të marrin në shqyrtim aplikimin e Shqipërisë, pasi të ketë mbaruar procesi zgjedhor, mazhoranca ka nxituar ta përdorë

Nëse dëshironi të lexoni edicionin online të gazetës në PDF klikoni këtu.

Pas deklaratës së ministrave të Jashtëm të Bashkimit Evropian se do të marrin në shqyrtim aplikimin e Shqipërisë, pasi të ketë mbaruar procesi zgjedhor, mazhoranca ka nxituar ta përdorë këtë mesazh duke bërë fakt të kryer se marrja në shqyrtim e aplikimit do të thotë patjetër se ai do i përcillet Komisionit për të përgatitur një vlerësim. Gjithashtu, mazhoranca ka bërë fakt të kryer se shqyrtimi i aplikimit do bëhet duke pasur në mendje një proces zgjedhor pa probleme.

Por e kundërta është e vërtetë. Ambasadori gjerman në Tiranë, Bernd Borchardt, tha gjatë një aktiviteti në Tiranë se, vlerësimi që do u bëhet zgjedhjeve të qershorit, do jetë shumë i rëndësishëm, kur të merret në shqyrtim kërkesa e Shqipërisë. Burime diplomatike kanë folur dhe për mundësinë e ri-aplikimit të Shqipërisë. Megjithatë gjasat janë që raporti i fundgushtit, i përgatitur nga vëzhguesit ndërkombëtarë të ODIHR, të jetë me shumë rezerva për procesin, nisur dhe nga fakti se numërimi ka qenë shumë problematik.

Një deputet i LSI, Dritan Prifti, bëri të njohur një detaj, sipas të cilit vetëm ndërhyrja e Berishës kishte bërë të mundur që të mos i vidheshin votat partisë së tij. Në këtë mënyrë duket se Berisha ka qenë në krye të një operacioni që komandonte se kujt do i ruheshin votat, e kujt jo.

Diplomatët e BE thonë megjithatë se mund të lëshojnë edhe ndonjë sinjal mbështetës për Shqipërinë, por rruga për të do jetë shumë e gjatë.

Edhe deklarata e fundit e Këshillit të Ministrave të BE kishte një rresht për Shqipërinë, që ishte futur me suportin e Italisë. Por burimet thonë se Gjermania, një vend kryesor në BE, që pritet të ketë dhe zgjedhje parlamentare në këtë vjeshtë, nuk është aq entuziaste për aplikimin e Shqipërisë.

Në këtë kohë krizë ekonomike dhe e mbushur me kundërshtime për zgjerimin, BE nuk është gati të bëjë asnjë hap të mëtejshëm.

Vendit tonë iu mohua e drejta e lëvizjes pa viza, ndërsa aplikimi për në BE u quajt një manovër elektorale e Berishës. Brukseli nuk duket më aq i prirur të bëjë favore për një qeverisje që del nga një rezultat zgjedhor i deformuar.

Rotacioni i pushteti dhe një qeverisje e re pas vitit 2005 bënë që Brukseli të nënshkruante MSA me Shqipërinë. Por pas disa kohësh marrëdhëniet me Brukselin u ftohën, për shkak se qeveria nuk arriti të luftonte aq sa shpresohej korrupsionin dhe krimin e organizuar, si dhe nuk lejoi që të zhvilloheshin pushtetet e pavarura.

Zgjedhjet ishin një kusht i rëndësishëm dhe shiheshin si historike për vendin, por dështimi me to ishte një goditje e rëndë për Shqipërinë.