Clinton kritikon Kinën

Sekretarja Amerikane e Shtetit, Hillary Clinton, kritikoi përkeqësimin e të dhënave për të drejtat e njeriut në Kinë.

Në një deklaratë publike, Clinton shprehu shqetësim rreth raportimit të arrestimeve arbitrare të disa aktivistëve dhe intelektualëve në javët e fundit, përfshi edhe artistin me famë ndërkombëtare, Ai Weiwei.

Kritikat e krye-diplomates amerikane u bënë, ndërsa Departamenti i Shtetit publikoi një raport për të drejtat e njeriut, pas vëzhgimit në 194 shtete.

Në raport u evidentuan shkelje serioze të të drejtave të njeriut edhe në Iran, Irak, Burma, Korenë e Veriut, Bregun e Fildishtë, Zimbabve, Ukrainë, Rusi dhe Bjellorusi.

Duke qenë se përfshin vetëm vitin 2010, në raport nuk pasqyrohen revolucionet në zhvillim që janë duke ndodhur në Lindjen e Mesme apo Afrikën e Veriut.