Devid Bekam, në krye të pasanikëve të futbollit

Futbollisti më i pasur nuk luan në Evropë, por në Shtetet e Bashkuara të Amerikës: natyrisht është Devid Bekam. Anglezi renditet i pari në klasifikimin e përvitshëm të "France Football". "Golden-boy" i Los Anxhelos Galaksi përfiton plotë 31 milionë euro në sezon. 4,2 milionë euro Bekam i përfiton nga rroga në skuadrën amerikane, 1,8 shpërblim e 25 milionë nga sponsorët dhe marketingu. Kjo është hera e parë në histori, që futbollisti më i pasur militon në një skuadër joevropiane. Mes pesë më të paguarve, tre lojtarë të Barcelonës. Ronaldinjo klasifikohet i dyti, me 24,1 milionë euro, përfitime nga të cilat 1/3 vjen nga reklamat. Edhe pse në moshë ende të re, Lionel Mesi është i treti, me 23 milionë euro. Në vendin e pestë Henri, që fiton 16,8 milionë euro në vit. I katërti (klasifikim padiskutim i merituar) është ylli i Mançester Junajted, Kristiano Ronaldo, me 19,5 milionë euro: 8,5 rrogë vjetore, 1 shpërblim për paraqitjet dhe 10 milionë nga kontrata të ndryshme për shfrytëzimin e imazhit. Sipas "France Football", për të parën herë, asnjë lojtar i Serisë A nuk ndodhet mes shtatë të parëve. I pari është braziliani i Milanit, Ronaldo, me 13,4 milionë euro, ndërsa Kaka fiton 12,9. "Pasaniku" i trajnerëve është Hoze Murinjo, edhe pse momentalisht portugezi nuk punon. Në vitin e fundit, ish-tekniku i Çelsit ka fituar 29 milionë euro. Në vendin e dytë, trajneri i "Tre Luanëve", Fabio Kapelo, me 14,2 milionë euro, ndërsa pas tij është Ferguson me 7,4. Një fakt kureshtar, shtatë trajnerët më të pasur punojnë ose kanë punuar në Premiershipin anglez.