Dhoma e Avokatëve: Shitja e “Crown Aquisition”, konform ligjeve

Dhoma Kombëtare e Avokatëve ka reaguar pas kërkesës së avokates Flutura Kola për shqyrtim të praktikave ligjore, duke e konsideruar shitjen e “Crown Aquisitions” konform ligjeve. Në një njoftim për mediat thuhet se “nga shqyrtimi i praktikës, tashmë i depozituar në regjistrin tregtar, Dhoma Kombëtare e Avokatëve konstaton se praktika ligjore e shitjes së kuotave të shoqërisë “Crown Aquisition” sh.p.k., është bërë konform kërkesave ligjore në fuqi, si në aspektin formal të dokumenteve të plotësuara, ashtu dhe në përmbajtje. Të gjitha veprimet e kryera nga avokatja, në zbatim të prokurës së lëshuar nga klienti i saj, janë në përputhje të plotë me ligjin. Dhe ajo që është më e rëndësishme në realizimin e kësaj praktike nga ana e avokates Flutura Kola, nuk ka asnjë shkelje të rregullave të Kodit të Etikës së avokatit. Gjithashtu,

Dhoma Kombëtare e Avokatëve shpreh shqetësimin e saj për sulmet e ngritura ndaj avokatëve, të cilët në ushtrimit ë profesionit të tyre, veprojnë në emër dhe llogari të klientit dhe jo në emrin e tyre personal. Sulme këto të cilat fatkeqësisht konstatohen në mënyrë të përsëritur. Duke konsideruar se sulme të tilla cenojnë integritetin e avokatit dhe cenojnë funksionimin konform ligjit të gjithë veprimtarisë së avokatisë në procesin e realizimit të ndihmës juridike, Dhoma Kombëtare e Avokatëve, duke marrë shkas nga rasti në fjalë, kërkon nga cilido të respektojë aktivitetin dhe kontributin sa të çmuar aq edhe fisnik të profesionit të avokatit.