Dibër, zbardhet vrasja e ndodhur para 13 viteve

Drejtoria e Krimeve të Rënda të Departamentit për Hetimin e Krimeve në Drejtorinë e Përgjithshme të Policisë në bashkëpunim me Drejtorinë e Policisë së Qarkut Dibër dhe Prokurorinë e Rrethit Gjyqësor Mat kanë arritur të zbardhin një ngjarje të rëndë të ndodhur para 13 viteve në këtë qark. Sipas burimeve të policisë zbardhja e ngjarjes u bë si rezultat i hetimeve intensive prej 2-vjetësh, duke përdorur metodat speciale të hetimit. Kështu policia bëri të mundur edhe zbulimin e autorëve të vjedhjes me armë me pasojë vrasjen e shtetasve Asllan Meçi dhe Rasim Elezi, ngjarje e ndodhur në datën 19.11.1996 në vendin e quajtur Shënlleshën të rrethit Dibër.
Autorët e këtij krimi, emrat e të cilëve nuk bëhen publike për arsye hetimi, të armatosur dhe të maskuar, u kanë dalë përpara autobusit të pasagjerëve të Komunës së Reçit, kanë vrarë drejtuesin e autobusit shtetasin Rasim Elezi dhe arkëtarin e Komunës shtetasin Asllan Meçi dhe më pas kanë marrë lekët e Komunës, një shumë rreth 12 milonë lekë të vjetra, e janë larguar nga vendi i ngjarjes.
Për autorët e kësaj vepre penale, nga Gjykata e Rrethit Gjyqësor Dibër, me ka caktuar masën e sigurisë "Arrest me burg".
Ndërkohë sipas policisë autorët e këtij krimi kanë rezultuar të jenë autorë të dyshuar edhe të disa veprave të tjera të rënda penale, të ndodhura në kohë të ndryshme në Qarqet Dibër dhe Tiranë.