Dita e Verës vjen në Tiranë me muzikë rrok te Blloku

 

Të gjithë duke festuar Ditën e Verës. Sot qytetarët do të kenë mundësi të bëhen pjesë e një sërë aktivitetesh. Për t’u krijuar sa më shumë hapësira, Bulevardi “Dëshmorët e Kombit”, Sheshi “Nënë Tereza”, rruga “Dëshmorët e 4 Shkurtit” dhe “Ismail Qemali” do të jenë të bllokuara deri pasdite vonë. Për të pestin vit radhazi, Dita e Verës festohet edhe në Tiranë.  Tradita e hershme pagane, që simbolizon ardhjen e stinës së ngrohtë, mbush në 14 mars të gjitha rrugët dhe sheshet kryesore të kryeqytetit. Aktivitete të larmishme janë organizuar nga Bashkia e Tiranës, për t’i dhënë sa më shumë ngjyrë ditës së sotme. Banda e qytetit, ansambli “Tirana”, këndi i fëmijëve dhe koncerti i madh në orën 12:00, janë të përhershme por këtë vit kjo festë sjell edhe risi të tjera. Muzika që të luhet në skenat e zonës së bllokut  do të  jetë rock, duke qenë se është rryma më e preferuar e momentit. Festimet e Ditës së Verës në kryeqytet këtë vit mbështeten edhe nga Ambasada Çeke, Holandeze dhe ajo e Mbretërisë së Danimarkës, të cilat kanë kontribuar për ardhjen e grupeve të rock-ut për këtë festë. “Ky eveniment mundëson shkëmbimin e kulturave ndërmjet vendeve të Bashkimit Evropian”, ka deklaruar Ambasadori Danez, Karsen Petersen. Shqipëria ndodhet për herë të parë në rrugën e integrimit euroatlantik dhe integrimi i vërtetë ndodh kur njerëzit takohen me njëri-tjetrin dhe këtë më mirë se çdo gjë tjetër e bën muzika”, ka theksuar Ambasadori Holandez. Festimet do të nisin rreth orës 10 me aktivitete për të gjitha moshat, duke mos lënë mënjanë edhe gatimet tradicionale të kësaj feste.