Drejtori s’është prioritet
Karrigeja e drejtorit të Përgjithshëm të Policisë së Kosovës ka mbetur e zbrazët. Që nga 25 korriku, në të nuk është ulur askush, prejse Reshat Maliqi u shkarkua nga posti, pas vetëm disa muajsh qëndrimi në të.
Maliqin e shkarkoi nga pozita kryeministri Hashim Thaçi, natën kur në veri të vendit u ndërmor operacioni për marrjen nën kontroll të pikave kufitare 1 dhe 31. Arsyet e shkarkimit të Maliqit nuk janë bërë të ditura, ashtu sikur së paku zyrtarisht ende askush nuk është emëruar ushtrues detyre në postin e lënë bosh. Në fakt, ushtruesin e detyrës së Drejtorit të Përgjithshëm të Policisë automatikisht e merr zëvendësdrejtori, e që në këtë rast këtë është Shpend Maxhuni.
Në Policinë e Kosovës bëjnë të ditur se për postin e drejtorit duhet të shpallet konkurs. “Këtë duhet ta bëjë Ministria e Punëve të Brendshme”, tha Brahim Sadriu, zyrtar për informim në Polici.
Por si duket, rreth 7 mijë policë do të vazhdojnë edhe më tutje të mos kenë udhëheqës, për shkak se drejtuesit e Ministrisë së Punëve të Brendshme nuk e kanë aspak në prioritet zgjedhjen e drejtorit të ri.
Kështu së paku thotë vetë ministri i Punëve të Brendshme, Bajram Rexhepi. Ai tha për Express se këtë çështje nuk e ka në prioritet tani për tani. Madje, ktheu përgjigje me nervozë kur u pyet në lidhje me shpalljen e konkursit për drejtor të Policisë.
“Allahile lemni rahat, nuk e kam hiç në prioritet këtë punë”, theksoi ai.
Në fakt, ishte vetë rexhepi ai, i cili pas sugjerimit të panelit intervistues, i kishte rekomanduar kryeministrit hashim Thaçi emrin e Reshat Maliqit pwr drejtor.
Sipas ligjit, ushtrues detyre në këtë post nuk mund të qëndrojë askush mbi tre muaj. Ndërsa në bazë të Ligjit për Policinë, për postin e drejtorit duhet të shpallet konkurs dhe pas kandidimit të personave, bëhet edhe intervistimi i tyre nga Komisioni për Emërime të Larta dhe Disiplinë në Polici. Ky komision i propozon ministrit të Brendshwm kandidatët për emërim në pozitën Drejtor i Përgjithshëm i Policisë, ndërkaq ministri i rekomandon kryeministrit kandidatët e mundshëm.
Drejtorin e Përgjithshëm të Policisë e emëron kryeministri, bazuar në propozimet e paraqitura nga ministri. Drejtori i Përgjithshëm emërohet për një periudhë trevjeçare dhe mund të riemërohet në fund të kësaj periudhe edhe për pesë vjet të tjerë, pa procedura konkurruese.
Drejtori, zëvendësdrejtori dhe çdo ndihmësdrejtor i Policisë mund të largohen nga detyra nga autoriteti që i ka emëruar para afatit të paraparë, për njërën nga këto arsye: me kërkesë të tij, për shkak të paaftësisë për t’i kryer detyrat në afatin gjashtëmujor për shkaqe shëndetësore, për mosplotësimin e detyrave dhe përgjegjësive të caktuara, nëse shpallet fajtor për shkelje të rëndë disiplinore dhe nëse është dënuar për vepër penale me vendim gjyqësor të formës së prerë.