Dy ditë para protestave, sekretari i NATO-s, Rasmusen, viziton sot Tiranën

Eljona Ballhysa
Tirana zyrtare do të vizitohet sot nga sekretari i Përgjithshëm i NATO-s, Anders Fogh Rasmusen, i cili do të zhvillojë takime me krerët më të lartë të shtetit shqiptar. Vizita e sekretarit Rasmusen ndodh vetëm dy ditë para zhvillimit të protestës së 30 prillit, të organizuar nga opozita, si dhe manifestimit që do të organizojë qeveria më 1 Maj. Drejtuesi më i lartë i NATO-s vjen në Shqipëri në një moment kur ngërçi politik vazhdon të mos gjejë zgjidhje, kur opozita vazhdon të bojkotojë punimet e Kuvendit dhe kur qeveria ka shënuar disa përplasje më Aleancën e Atlantikut të Veriut. Këtu veçojmë miratimin nga komisionet parlamentare të projektligjit për Shërbimin Informativ Shtetëror, i cili u tërhoq nga axhenda e punimeve të Kuvendit vetëm pas presionit të vetë sekretarit të Përgjithshëm të NATO-s, Rasmusen. Pritet që në takimet e sotme të vlerësohet kontributi i Shqipërisë me misione paqeruajtëse në vendet ku operon NATO-ja, si dhe roli konstruktiv që vendi ynë ka luajtur në politikën rajonale të fqinjësisë së mirë. Ndërkaq, “pas kuintave” pritet që sekretari i Përgjithshëm i NATO-s të kërkojë nga qeveria dhe politika shqiptare në veçanti zgjidhjen e ngërçit politik në vend, funksionimin e plotë të institucioneve demokratike si dhe hartimin e ligjit të SHISH-it me asistencën e ekspertëve të NATO-s.
Axhenda
Në axhendën e takimeve të sekretarit të Përgjithshëm të NATO-s, i cili e viziton për herë të parë Shqipërinë, janë parashikuar një sërë takimesh me autoritetet më të larta të vendit. Sipas njoftimeve zyrtare nga Ministria e Jashtme, takimin e parë sekretari i Përgjithshëm i Aleancës Veriatlantike do ta ketë me zëvendëskryeministrin dhe ministrin e Jashtëm, Ilir Meta, me të cilin do të japë dhe një konferencë të përbashkët për shtyp. Më pas, Rasmusen do të pritet në Ministrinë e Mbrojtjes nga ministri Arben Imami, për të vijuar me takimin në Kryeministri me kryeministrin Sali Berisha, me të cilin do të ketë dhe një deklaratë për mediat. Axhenda e sekretarit të Përgjithshëm të NATO-s do të pasohet nga takimet me kryetaren e Kuvendit, Jozefina Topalli dhe me Presidentin e Republikës, Bamir Topi. Anders Fogh Rasmusen, ish-kryeministër i Danimarkës, u zgjodh në postin e sekretarit të Përgjithshëm të Aleancës në prill 2009, gjatë punimeve të Samitit të NATO-s në Strasburg. Ai zëvendësoi në këtë post holandezin Jaap de Hoop Scheffer.
Presioni
Megjithëse ende nuk është konfirmuar zyrtarisht, u mësua nga burime konfidenciale se sekretari i Përgjithshëm i NATO-s, Rasmusen, ishte ai që bëri të mundur tërheqjen e qeverisë “Berisha” nga miratimi i ligjit për SHISH-in. Burimet bënë të ditur se Rasmusen i ka telefonuar kryeministrit Sali Berisha duke i kërkuar atij të tërheqë projektligjin për funksionimin e Shërbimit Informativ Shtetëror. Thelbi i bisedës ka qenë se kur Aleanca ka një shqetësim të kësaj natyre, Shqipëria nuk mund ta injorojë atë dhe të vazhdojë me këmbëngulje në rrugën e nisur. Menjëherë pas kësaj telefonate, ligji u tërhoq dhe maxhoranca pranoi se do ta konsultonte me partnerët e NATO-s. Ndaj, aktualisht, projektligji gjendet në sirtarët e Ministrisë së Drejtësisë deri në një moment tjetër, kur të marrë edhe mendimin e ekspertëve ndërkombëtarë.
I pari që reagoi kundër projektligjit për SHISH-in ishte ambasadori i SHBA-ve në Tiranë, John Withers. Gjatë një deklarate për mediat, Withers tha se ligji i ri cenon pavarësinë e SHISH-it, e fut atë nën kontroll politik dhe dëmton imazhin e Shqipërisë. Ai kërkoi shtyrjen e votimit të këtij ligji dhe pranimin e ekspertizës së huaj. Por u desh telefonata e zotit Rasmusen që Berisha të tërhiqej nga ky ligj i kundërshtuar nga ndërkombëtarët dhe nga vetë NATO.

Qeveria përcakton fondet për bashkësitë fetare në Shqipëri

Këshilli i Ministrave miratoi gjatë mbledhjes së djeshme një fond prej 100 milionë lekësh që do të akordohen nga buxheti i shtetit për vitin 2010, duke ua dhënë bashkësive fetare që kanë nënshkruar marrëveshje bashkëpunimi me qeverinë.
Në bazë të këtij vendimi, Komuniteti Mysliman i Shqipërisë përfiton shumën 28 milionë lekë, prej të cilave 18 360 000 lekë do të përdoren për financimin deri në gjysmën e pagës minimale buxhetore për punonjësit e administratës dhe 9 640 000 lekë do të përdoren për ndërtimin e për mirëmbajtjen e objekteve të kultit në Durrës, Has, Kolonjë, Tropojë-Degë.
Ndërsa Kisha Ortodokse Autoqefale e Shqipërisë përfiton shumën 24 milionë lekë, prej të cilave 22 680 000 lekë do të përdoren për financimin deri në gjysmën e pagës minimale buxhetore për punonjësit e administratës dhe 1 320 000 lekë do të përdoren për financimin për pagat e arsimtarëve të institucioneve të arsimit parashkollor, parauniversitar dhe universitar. Kisha Katolike në Shqipëri përfiton shumën 24 milionë lekë, prej të cilave 3 348 000 lekë do të përdoren për financimin deri në gjysmën e pagës minimale buxhetore, për punonjësit e administratës dhe 20 652 000 lekë do të përdoren për financimin për pagat e arsimtarëve të institucioneve të arsimit parashkollor, parauniversitar dhe universitar.
Kryegjyshata Botërore Bektashiane përfiton shumën 24 milionë lekë, prej të cilave 4 320 000 lekë do të përdoren për financimin deri në gjysmën e pagës minimale buxhetore, për punonjësit e administratës; 12 680 000 lekë do të përdoren për ndërtimin e për mirëmbajtjen e objekteve të kultit “Odeoni”, 7 milionë lekë jepen për shkak të pozitës së veçantë, si Kryegjyshatë Botërore me qendër në Tiranë dhe të shtrirjes së veprimtarisë së saj jashtë vendit.

29 Prill 2010