E presin Gjykatën
Dosjes së Presidentit Behgjet Pacolli i është shtuar edhe një fakt për shkelje të Kushtetutës.
Vota e dhënë për Qeverinë e Kosovës, pak minuta pasi kishte bërë betimin si President, i është shënuar në procesverbalin e Kuvendit të Kosovë që është miratuar me shumicë votash të enjten në Kuvendin e Kosovës.
Ky fakt pritet të shfrytëzohet nga deputetët e opozitës, të cilët ende nuk kanë vendosur nëse do t’i drejtohen për herë të dytë Gjykatës Kushtetuese për të kërkuar interpretim ligjor nëse Shefi i Shtetit ka bërë shkelje kushtetuese.
Tri ditë më parë, LDK’ja bashkë me AAK’në, kërkuan nga Gjykata Kushtetuese interpretim ligjor për procedurat e zgjedhjes së Behgjet Pacollit në krye të shtetit.
Tash, partitë politike kanë afat prej 30 ditësh, nga momenti kur Pacolli votoi për Qeverinë e re, për ta dërguar në Gjykatë pretendimin e dytë se është shkelur Kushtetuta nga Presidenti.
Ish-kryetari i AKR’së votoi për Qeverinë, pasi ishte betuar si President, me gjasë pa e ditur se një gjë e tillë do të mund të përbënte shkelje kushtetuese.
Mirëpo, Pacolli ka thënë se nuk e di nëse ka votuar për Qeverinë, derisa rreth pohimeve nëse e ka shkelur Kushtetutën, sipas tij duhet të pritet vendimi i Gjykatës Kushtetuese.
Kryetari i Gjykatës më të lartë në vend, Enver Hasani ka thënë se nëse vërtetohen pretendimet e opozitës se janë shkelur procedurat ligjore me rastin e zgjedhjes së Presidentit, atëherë çështja kthehet në pikën zero.
Hasani ka theksuar se nëse ndodh një gjë e tillë, nuk është e nevojshme dorëheqja e Pacollit, përveçse duhet të përsëritet procedura e zgjedhjes së Presidentit.
Sido që të jetë, në Aleancën për Ardhmërinë e Kosovës thonë se janë duke u përgatitur që lëndën e dytë për Behgjet Pacollin ta dërgojnë në Gjykatë.
“Jemi duke u përgatitur që ta dërgojmë lëndën në Gjykatën Kushtetuese rreth shkeljes që ka bërë Presidenti në rastin e votimit të Qeverisë”, ka thënë Nënkryetari i AAK’së, Ahmet Isufi për Express.
Ai ka deklaruar se disponimi në AAK dhe në partitë opozitare është për t’i shkuar deri në fund “Rastit Pacolli”.
“Normalisht se ne e kemi theksuar që në fillim se është shkelur Kushtetuta dhe Rregullorja e Kuvendit, prandaj kemi deklaruar se do t’i përdorim të gjitha mundësitë ligjore në mënyrë që të vërtetohet shkelja që është bërë në Parlament”, ka shtuar Isufi.
Edhe Arben Gashi i LDK’së thotë se grupi i ekspertëve të kësaj partie është duke punuar rreth çështjes së Presidentit.
“Duhet me u pa a kemi President, a jo. Nëse nuk kemi President, duhet me pa a duhet me dërgu, a jo. Nëse Gjykata Kushtetuese thotë se kemi President, atëherë shkon lënda tjetër që ai President e ka shkelë Kushtetutën”, ka thënë ai.
“Ka kohë, të shohim”, ka thënë Gashi, kur është pyetur për afatin njëmujor për të dërguar pretendimet për shkelje të Kushtetutës nga ana e Behgjet Pacollit.
Ndryshe, Rexhep Selimi i Lëvizjes Vetëvendosje ka thënë se shkeljet e Kushtetutës nga ana e udhëheqësve të institucioneve janë bërë ‘normale’ dhe se nuk shohin zgjidhje as në Gjykatën Kushtetuese.
“Parregullsitë ne raport me Kushtetutën që këta vetë e kanë miratuar, janë bërë tashmë rregullsi.... Nuk do të sillte asgjë të re ndërhyrja edhe e Gjykatës Kushtetuese”, ka thënë Selimi për Express.
Ai ka thënë se Vetëvendosja do t’i kundërshtojë veprimet e udhëheqësve të institucioneve brenda dhe jashtë Kuvendit dhe nuk ka specifikuar se a do t’iu bashkohen nismave opozitare për “Rastin Pacolli”.
Shefi i Grupit Parlamentar të AKR’së, Ibrahim Makolli kishte propozuar në seancën e së enjtes heqjen e votës së Pacollit nga procesverbali i Kuvendit dhe që ajo të shpallet e pavlefshme.
Madje, Makolli ka lënë të kuptohet se Kryetari i Kuvendit të Kosovës, Jakup Krasniqi ka nxitur veprimet e Pacollit për të votuar për Qeverinë, pasi ai është bërë President i Kosovës.
Por, përgjigjja e Jakup Krasniqit ka ardhur të premten, duke e mohuar se e ka thirrur me emër, Presidentin Behgjet Pacolli për të votuar si deputet.
Ai tha se Pacollin e ka thirrur vetëm për t’ia uruar detyrën e re.