Edi Rama fyen sërish Këshillin e Evropës, deklaron se s’ka interes për Komisionin e Venecias

Vetëm një ditë, pasi socialistët hynë e dolën nga salla e seancave plenare të Kuvendit, Edi Rama ka detajuar axhendën e tij politike, duke konfirmuar se s’kishte asnjë interes të përmbushte tre pikat e rekomanduara nga delegacioni i Asamblesë parlamentare të Këshillit të Evropës. “Nuk kemi interes për Komisioni i Venecias” është përgjigjur në mënyrë të thatë Edi Rama, lidhur me interesimin e gazetarëve, nëse ai do të çonte në Kushtetuese apo në Strasburg për interesim kërkesën e tij për hapjen e kutive të votimit. Në takimin e përjavshëm me mediat, kryesocialisti ka deklaruar se është në pritje të një përgjigje nga maxhoranca, e cila ka në dorë sipas tij, kthimin e opozitës në sallën e Parlamentit ose vijimin e protestave popullore, por duke lënë të kuptohej se ai ishte fort i interesuar për vijimin e krizës dhe jo për hapjen e kutive. Deputeti socialist Ben Blushi, një ditë më përpara konfirmoi se Edi Rama ishte njeriu i fundit që kërkonte hapjen e kutive të votimit, pasi ky veprim jo vetëm do t’i rikonfirmonte humbjen e zgjedhjeve të 28 qershorit, por edhe do të shkërmoqte lidershipin e tij brenda PS-së. “Prandaj, theksoi ai, gjithçka është propagandë dhe përpjekje për të përfituar politikisht përmes krizave apo taktikave që janë afër strategjive të marrjes së pushtetit me dhunë”.