Edi Rama kërcënon me përjashtim nga partia të gjithë zërat kundër

Dje është shqiptuar ultimatumi i përjashtimit automatik të të gjithë deputetëve që dalin kundër vendimeve politike. Pas votës “pro” Fullanit të Blushit e Malajt, fshesa po kërcënon edhe Islamin e Harasanin, të cilët janë përjashtuar nga lista e propozimeve për kryesinë e re

Edi Rama ka kërcënuar dje në mbledhjen e grupit parlamentar të PS-së, deputetët, që në seancat e Kuvendit do të votojnë kundër vendimit politik të PS-së.
Sipas ultimatumit të kreut të kësaj partie, mësohet se, vendimet politike të grupit parlamentar të PS-së duhet të zbatohen në unanimitet nga të gjithë ligjvënësit socialistë. Nisur nga eksperiencat e fundit në seancat parlamentare, ku është votuar në kundërshtim me vendimin politik të PS-së, lidershipi socialist preferoi që t’u bëjë me dije së në rast përsëritjeje do të zbatohet rregullorja e grupit dhe statuti i PS-së.
Kërcënimi i djeshëm i Edi Ramës, ndërsa bëhet në prag të zgjedhjeve të anëtarëve të kryesisë së re të kësaj partie, shihet dhe lexohet edhe si një paralajmërim, për përjashtimin e zërave kundër.
Lista e kandidatëve për anëtarë të kryesisë së PS-së, që qarkullon në mediat e Edi Ramës, ndërsa zbulon përjashtimin nga ky kandisim të zërave kundër, bashkë edhe me paralajmërimin e djeshëm në mbledhjen e grupit parlamentar, është një mesazh se zërat kundër në parti, janë vetëm një hap larg, nga flakja nga ky formacion politik.
Ndërkohë në mbledhjen e djeshme të deputetëve socialistë, Edi rama u ndal edhe në komentet dhe qëndrimet për situatën politike në vend.
Kryetari i Partisë Socialiste, Edi Rama theksoi dje gjatë mbledhjes së grupit parlamentar të PS-së, qëndrimin kundër projekt buxhetit të vitit 2012, në pretekstin se kriza ekonomike ka prekur palcën e ekonomisë kombëtare dhe familjare.
Duke iu referuar këtij debati të rëndësishëm parlamentar për projekt-buxhetin 2012, Rama tha se, kambanat e PS-së për krizën, megjithëse ranë në kohën e duhur dhe kur kishte ende kohë për ta ndalur inercinë e krizës, nuk u dëgjuan.
Sipas tij, “projekti për heqjen e TVSH-së për disa ushqime bazë  e lehtëson barrën e krizës për familjet shqiptare. Duhet të këmbëngulim që zëri i arsyes në hartimin e buxhetit të vitit të ardhshëm të dëgjohet sa më shumë”.
Rama gjithashtu theksoi se “PS kundërshton nxjerrjen për privatizim të 4 hidrocentraleve që së fundi janë shkëputur dhe nga bilanci i KESH për të krijuar një kompani të re”.
Edi Rama, deklaroi gjithashtu, se deputetet e opozitës nuk do ta mbështesin kandidaturën e Bujar Leskajt në krye të Kontrollit të lartë të shtetit. Sipas Ramës, Partia Socialiste do të mbështesë një figurë jo politike në krye të KLSH-së,  e propozuara nga kjo forcë politike në paktin prej 10 pikash.
Për zgjedhjen e Avokatit të Popullit, Rama tha se,”duam si Avokat të popullit, një figurë të denjë në shërbim të Kushtetutës dhe popullit shqiptar, jo një të emëruar për interesa partiake apo vetjake”.