Edvini, në izolim të plotë, paraqitet në Itali me të akuzuarin për korrupsion

Në krah të ish-kryebashkiakut të Peskarës, nën hetim për korrupsion, krijim strukture të organizuar për mashtrim dhe shpërdorim detyre, Edi Rama ka rifolur për fasadat dhe bojatisjet, si risia politike e para 10 viteve, por që po shndërrohet edhe në ngjyrën e funeralit të tij politik

Edi Rama ka synuar të shmangë izolimin ndërkombëtar dhe për të dhënë imazhin se ka edhe ortakë që e këshillojnë, ka shkuar dhe është shfaqur si krimineli në vendin e krimit, në krah të ish-kryebashkiakut të Peskarës, një figurë e njohur e gjykatave italiane, të cilat, pasi zgjedhësit e ndëshkuan me humbje, e kanë vënë nën një proces hetimor, për korrupsion të organizuar. Në të ashtuquajturin forum të “Demokracitë në ngjyra - Rishpërndarja e hapësirave, prodhon demokraci”, në rajonin e Abrucos në Itali, u shfaq dje Edi Rama në krah të Luçiano D’Alfonsos, ish-kryebashkiakut të Peskarës, i cili ka me 9 maj, seancën e radhës gjyqësore, për akuzën “korrupsion, mashtrim, krijim i strukturës së organizuar për mashtrim, shpërdorim detyre, favorizim dhe cenim të lirisë”. Vetë D’Alfonso arriti deri aty sa të thoshte se e kishte thirrur Edi Ramën që t’u jepte shembull italianëve për lyerjen me ngjyra të disa ndërtesave të Tiranës (aksion i kryer para 11 vitesh), pasi kështu ishte rikonceptuar hapësira e tiranasve.
Merret vesh se në zijafetin e italianit nën hetim s’u fol as për betonizimin e Tiranës e as për shembujt e tjerë të korrupsionit që vijnë nga këndej detit, por veç për shembullin e bojatisjes, të cilin edhe vetë Edi Rama kish turp ta rimerrte dhe veç përsëriti se versioni i fasadave shtrohej për diskutim dhe jo si shembull.
Kështu, modeli i bojërave u rrëzua edhe pse i hetuari për korrupsion e përsëriti gjatë gjithë mbledhjes (pasi për këtë arsye duket se edhe ishte paguar aktiviteti), por mbeti konfirmimi se Edvini ndihet vetëm brenda e jashtë vendit e se të vetmit partnerë të tij (në vështirësi - merret me mend) mbesin të vënit nën akuzë për korrupsion.
Gjithsesi, ajo që vleu për t’u përmendur nga mbledhja e porositur e ditës së djeshme ishte aksidenti me makinë që pësoi kryetari i Këshillit Bashkiak të Molizes, i cili ishte duke shkuar në takimin me Edi Ramën dhe D”Alfonson, por pa pasoja për jetën. Ishte një zhvillim dramatik, i cili qe pa pasoja, por s’e dimë nëse pas takimit, Edvinit ka pasur mundësi të mendojë për të drejtën hyjnore, por edhe për ndëshkimin hyjnor.