Egjipti shumë shpejt do të marrë vendim për njohjen e Kosovës

Ministri i Punëve të Jashtme të Kosovës, Enver Hoxhaj ka thënë se njohja e pavarësisë së Kosovës nga ana e Egjiptit do të ishte një përmbyllje e ciklit të miqësisë historike mes dy popujve.

Me ftesë të Ministrisë së Punëve të Jashtme të Republikës së Kosovës, një delegacion i gjerë i gazetarëve dhe përfaqësuesve të tjerë të shoqërisë civile nga Egjipti, po qëndrojnë për vizitë tre ditore në Kosovë.

Delegacioni i shoqërisë civile dhe medieve egjiptiane, gjatë qëndrimit në Republikën e Kosovës, janë pritur nga ministri i Punëve të Jashtme, Enver Hoxhaj.

Në këtë takim, ministri Hoxhaj ka informuar gazetarët për reformat e brendshme dhe rëndësinë e fuqizimit të pozitës ndërkombëtare të Republikës së Kosovës.

Ai ka thënë se kultivimi i marrëdhënieve të mira mes Republikës së Kosovës dhe Egjiptit është investim në histori dhe në të ardhmen e dy shteteve.

Nga ana tjetër kryesuesi i delegacionit të shoqërisë civile dhe medieve egjiptiane, ambasadori Mohamed Fathy Rifah El Tahatavi ka siguruar ministrin Hoxhaj se Egjipti shumë shpejt do të marrë vendimin për njohje e Republikës së Kosovës.

“Njohja e Kosovës nga Egjiptit do të vijë në një moment të rëndësishëm për Republikën e Kosovës që do ta arsyetojë tërë vonesën e deritashme”, ka paralajmëruar ai.

Vizita e delegacionit të gjerë egjiptian në Kosovë, pritet të ketë efekte të rëndësishme në avancimin e qëndrimit të opinionit publik dhe elitës politike në Egjipt, sidomos pas ndryshimeve demokratike të muajve të fundit, karshi njohjes së shtetit të pavarur dhe sovran të Kosovës.