"Ekologjia e kryeqytetit duket e braktisur nga të gjithë"

Tirana të kujton atë burrin e grindur që rruan përditë fytyrën e parfumosur, por morrat i ka në kokë dhe çorapet i kutërbojnë. Ruajtja e parametrave të domosdoshme të sigurisë, të higjienës dhe të ambientit, duket një gjë e pamundur. Në përgjithësi, ekologjia e Kryeqytetit duket e braktisur, jo vetëm nga politika, por edhe nga intelekti, nga arti, nga kapitali dhe nga institucionet e besimit. Fatkeqësisht mungojnë përpjekjet e faktorëve në vend, për sensibilizimin e popullatës për një jetë të pastër në ambiente njerëzore.

Tirana e ndotur është një faj i të gjithëve. Duket sikur askush nuk shqetësohet për asgjë, edhe kur problemet janë të rëndësishme dhe jetike. Duket sikur komunitetit në përgjithësi i mungojnë reflekset e kundërshtisë. Rrimë thjesht në heshtje, në mosbesim, në pasivitet.

Publiku shqiptar hesht, toleron, nguron, harron, ose e shumta kalon në një murmuritje pakënaqësie që shuhet pa filluar. Heshtja qytetare nga njëra anë dhe krizat politike nga ana tjetër, janë shndërruar në një telenovelë të neveritshme.