Ekonomia/Greqia buzë humnere, rrezikon të mos marrë kredinë prej 12 mld euro nga trojka

Kolapsi ekonomik nuk largohet prej fqinjit tonë jugor. Greqia është në rrezik që të mos marrë pjesën e pestë të 12 miliardë eurove të kredisë nga ndërkombëtarët gjatë muajit të ardhshëm. Shkak për këtë është bërë marrëveshja politike në vend, gjë të cilën e ka theksuar edhe komisioneri europian Olli Rehn, i cili theksoi se koha po mbaron dhe për këtë duhet arritur marrëveshja sa më parë.

Ndërsa në vend vijojnë protestat e qytetarëve kryesisht në Selanik dhe Athinë, Kryeministri Papandreu nuk mundi të sigurojë konsensusin e nevojshëm politik ndërpartiak, kërkuar si kusht nga trojka për livrimin e parave por edhe akordimin e një kredie të re prej 60 miliardë eurosh për evitimin e falimentimit të vendit dhe vazhdimin e reformave.

Mediat greke raportojnë se mbledhja e krerëve partiakë, nën kryesinë e Presidentit  Karolos Papulias, përfundoi pa rezultat.

“Do të vazhdojmë përpjekjen e konsensusit kombëtar për të mirën e vendit me një synim: të shpëtojmë atdheun por dhe ta ndryshojmë rrënjësisht”- mësohet të jetë shprehur kryeministri grek Jorgo Papandreu.