Ekstradimi i Hamdi Haklajt, Prokuroria apelon në Suedi

 

TIRANE – Prokuroria e Përgjithshme shqiptare ka apeluar vendimin e Gjykatës së Goteborgut në Suedi, e cila pak muaj më parë vendosi të mos ekstradojë në Shqipëri Hamdi Haklajn, personin e shumëkërkuar nga drejtësia. Lajmi konfirmohet nga burime zyrtare të organit të akuzës, sipas të cilave pak ditë më parë, Prokuroria e Përgjithshme ka nisur një kërkesë shkresore në adresë të homologëve suedezë. Prokuroria e Përgjithshme ka kërkuar nga Prokuroria homologe në Suedi që në emër të akuzës, të bëjë një padi në Gjykatën vendase të Shkallës së dytë ku të kërkojë prishjen e vendimit të Gjykatës së Goteborgut, e cila vendosi kundër ekstradimit të Hamdi Haklajt në Tiranë. Sipas burimeve zyrtare nga Prokuroria, kërkesa e palës shqiptarë ka mbërritur në Suedi por procesi gjyqësor që ka për qëllim ekstradimin e Hamdi Haklajt ende nuk ka filluar në Gjykatën e Shkallës së Dytë. Kjo e fundit është duke shqyrtuar çështjen para se të hapë procesin, në fund të të cilit pritet të marrë një vendim përfundimtar. Hamdi Haklaj i arrestuar nga policia në Suedi me kërkesë të zyrës së Interpol Tirana që e kishte shpallur në kërkim ndërkombëtar, është në proces gjykimi në Gjykatën e Tiranës, për akuzën e vrasjes ndaj Ramë Hoxhës dhe mbesës së tij, Fatime Hoxha. Kjo ngjarje ka ndodhur më 10 qershor 2004 në vendin e quajtur “Qafa e Rumikut” në veri të vendit. Prokuroria e akuzon Hamdi Haklajn se në këtë ngjarje ka tentuar të vrasë shtetasit Rexhep Hoxha, Valmira Hoxha, Servete Hoxha, Zenel Hoxha, Nafie Hoxha dhe Adem Sadiku, pas mosmarrëveshjeve mes dy palëve.