Emrat e kryesisë së re të PS-së Gramoz Ruçi, më i votuari
Partia Socialiste mbyll procesin e brendshëm elektoral me zgjedhjen e 17 anëtarëve të kryesisë. Ikin Allushi, Shamku, Pino e Hafizi, zgjidhen për herë të parë Shkëlqim Cani, Sajmir Tahiri e Vangjush Dako
Partia Socialiste ka mbyllur dje me zgjedhjen e kryesisë, sekretariatit ekzekutiv dhe kreut të ri të Asamblesë, procesin e brendshëm elektoral. Gramoz Ruçi ka qenë kandidatura më e votuar nga 210 anëtarët e Asamblesë, që morën pjesë në procesin e votimit të djeshëm. Përveç 190 votave, që mori në garën për kryetar të ri të Asamblesë, Gramoz Ruçi ka kryesuar edhe listën e konkurrentëve për anëtar të kryesisë së Partisë Socialiste me 177 vota, i ndjekur nga Erion Braçe me 150 vota. Ndërkohë që kryesia e re e PS-së është rinovuar në 30 për qind të saj, pasi nga 16 anëtarët që kishte deri dje, ajo nuk ka rizgjedhur vetëm 5 prej tyre.
Votimi
Në përfundim të fjalës së tij para Asamblesë Kombëtare, kreu i PS-së, Edi Rama, ka prezantuar edhe listën që ai i propozonte Asamblesë Kombëtare për anëtarë të kryesisë së re të kësaj force. Kështu, ai ka propozuar fillimisht kandidatet femra, ku dhjetë emra janë propozuar për të konkurruar për pesë vende. Më konkretisht, ai ka propozuar Arta Daden, e cila tashmë nuk do jetë më sekretare për Marrëdhëniet me Jashtë, Valentina Leskajn, Eglantina Gjermenin, Vasilika Hysin, Irena Kallçon, Mimi Kodhelin, Luiza Xhuvanin, Adelina Fariçin dhe Mimoza Hafizin. Ndërkohë që për 12 vende që i përkisnin burrave, Rama ka propozuar plot 20 emra dhe më konkretisht: Gramoz Ruçin, Erion Braçen, Ben Blushin, Ditmir Bushatin, Pandeli Majkon, Shkëlqim Canin, Namik Doklen, Arben Malajn, Sajmir Tahirin, Besnik Baren, Vangjush Dakon, Arben Isarajn, Niko Peleshi, Ulsi Manjan, Ethem Rukën, Qazim Sejdinin, Namik Koplikun, Maqo Lakrorin, kreun e komunës Xarë, Dhimo Koten dhe Gëzim Tushen. Anëtarët e Asamblesë janë ftuar të votojnë në dy fleta votimi, një për kandidatet femra dhe një për meshkujt. Ndërkohë që listat e propozuara nga Rama nuk janë lënë të diskutohen, megjithëse Arta Dade ka kërkuar që të fliste për këtë çështje, ndërsa kreu socialist e ka konsideruar të panevojshëm një debat të tillë, përsa kohë çdo anëtar i Asamblesë kishte të drejtën të bënte propozime shtesë, e drejtë kjo që në fakt nuk është ezauruar nga askush. Ajo që ka rënë në sy gjatë procesit të votimit ka qenë largimi i deputetit Erion Braçe, i cili nuk ka marrë pjesë në të. I pyetur nga MAPO lidhur me këtë veprim, ai është shprehur vetëm me fjalët: “Unë nuk votoj veten”.
Kryesia
Për shkak të problematikës që ka lindur me procesin e numërimit elektronik, numërimi i votave për anëtarë të kryesisë është bërë me dorë. Në fillim janë numëruar votat për kandidatet femra dhe në përfundim ka rezultuar se Mimi Kodheli ka qenë më e votuar me 147 vota dhe pas saj, Eglantina Gjermeni me 134 vota. Me radhë pas tyre janë renditur Lindita Nikolli me 114 vota dhe në fund Valentina Leskaj dhe Arta Dade me nga 112 dhe 111 vota secila. Pesë kandidatet e tjera kanë mbetur jashtë kryesisë, pasi kanë marrë më pak vota. Më pas ka nisur procesi i numërimit të votave për kandidatët meshkuj dhe në mbrëmje, rreth orë 21, komisioni ka mundur të shpallë rezultatin edhe për këtë pjesë. Kështu, listën e fituesve për kandidatët burra e ka kryesuar Gramoz Ruçi me 177 vota, dhe pas tij më i votuar ka qenë deputeti Erion Braçe me plot 150 vota. Ben Blushi është renditur i treti me 144 vota dhe pas tij Ditmir Bushati me 139 vota e Pandeli Majko e 135 vota. Në kryesi është futur edhe ish-guvernatori i Bankës së Shqipërisë, Shkëlqim Cani, Sajmir Tahiri e Vangjush Dako, të cilët bëhen pjesë për herë të parë të kryesisë. Ndërkohë që është rizgjedhur Arben Malaj, Arben Isaraj, Namik Dokle e Besnik Baraj. Të larguarit nga kryesia janë Ermelinda Meksi, e cila ka hequr dorë nga politika për shkak të zgjedhjes në Këshillin Drejtues të BSH-së; Eva Allushi, e cila u reshtua në grupin e LMN-së; Ledi Shamku e Sajmira Pino, të cilat nuk u rikandiduan nga Rama si dhe Mimoza Hafizi, që megjithëse ishte pjesë e listës së propozuar nuk mori dot votat e duhura për t’u rizgjedhur.
Kryesia e re e PS-së
Gramoz Ruçi 177 vota
Erion Braçe 150 vota
Ben Blushi 144 vota
Ditmir Bushati 139 vota
Pandeli Majko 135 vota
Shkëlqim Cani 132 vota
Namik Dokle 132 vota
Arben Malaj 131 vota
Sajmir Tahiri 129 vota
Besnik Barej 124 vota
Vangjus Dako 124 vota
Arben Isaraj 116 vota
Mimi Kodheli 147
Eglantina Gjermeni 134 vota
Lindita Nikolla 114
Valentina Leskaj 112
Arta Dade 111
Mbetën jashtë
Niko Peleshi 88 vota
Ulsi Manja 85 vota
Ethem Ruka 85 vota
Qazim Sejdini 84 vota
Namik Kopli 82 vota
Maqo Lakrori 77 vota
Dhimo Kote 58 vota
Gëzim Tushe 31 vota
Luiza Xhuvani 106
Vasilika Hysi 97
Adelina Fariçi 72
Mimoza Hafizi 62
Lindita Kallço 24
Kryesia e vjetër
1. Edi Rama
2. Arben Isaraj
3. Arben Malaj
4. Ben Blushi
5. Erion Braçe
6. Ermelinda Meksi
7. Eva Allushi
8. Gramoz Ruçi
9. Ledi Shamku
10. Mimoza Hafizi
11. Namik Dokle
12. Pandeli Majko
13. Saemira Pino
14. Valentina Leskaj
15. Mimi Kodheli
16. Lindita Nikolla