Erion Kadilli me nje dokumentar ne Torino

Në kinemanë “Massimo” të Torinos është shfaqur filmi dokumentar “Sono stato dio in Bosnia. Vita di un mercenario” (Kam qenë zot në Bosnjë. Jeta e një mercenari) i regjisorit të ri shqiptar, Erion Kadilli. Filmi është bërë sipas romanit “La guerra in casa”, të autorit italian, Luca Rastell. Autori ka zgjedhur thuajse të mos bëjë montazh të imazheve duke mos dhënë gjykimin e duke ftuar spektatorët të ndajnë një dorëzim të tronditur përballë spektaklit të së keqes, spektaklit të vetes dhe të shpërbërjes së vet të dhënë nga Roberto Della Fave, mercenar, satanist, snajper, profesionist i vdekjes. Filmi ofron materiale për një reflektim mbi konceptin e të keqes, mbi imanencën e saj absolute, mbi banalitetin, mbi vanitetin, narcisizmin që sjell, mbi arratisjen, vetminë, mbi njëmijë argumente të mundshme dhe shqetësuese; një përmbledhje materialesh, të cilat nuk ofrojnë një zgjedhje drejtimi, aq më pak një gjykim. Duket se spektatori ftohet t’i përdorë materialet si t’i shkojnë për shtat, të reagojë si të preferojë: me neveri, alarm, dhembshuri. Spektatori ka në dispozicion jetën e Robertos, imazhin që ai zgjedh të japë për të duke ndërthurur rrëfime vetëkënaqësie dhe autoakuza... Sekuenca më e tmerrshme e filmit, ajo në të cilën mercenari satanist i bën leksion një klase italiane të Fiume-s, të eksituar, të rrëmbyer, të admiruar nga bukuria e jetës së tij të mbrapshtë, nën sytë e një mësuesi të zënë ngushtë.