Fakti/Mazhoranca i zbulon publikut se Edi Rama ushqen një krizë artificiale, pasi u trembet zgjedhjeve lokale të 2011

Deputeti demokrat Aldo Bumçi tha dje se Edi Rama ushqen një krizë artificiale, pasi u trembet zgjedhjeve lokale të 2011.
Sipas Bumçit ishte PS ajo që anashkaloi zgjidhjet për ngërçin politik, ndonëse në fund të muajit korrik u rikthyen negociatat, të cilat deri tani nuk sollën asnjë produkt.
Deputeti Aldo Bumçi tha më tej se qëndrimet e institucioneve ndërkombëtare janë të qarta mbi këtë çështje, kur shprehen se zgjidhja duhet të kalojë në kanale ligjore e kushtetuese. Për këtë deputeti demokrat sjell në vëmendje dhe deklaratën e ambasadorit te ri amerikan për Shqipërinë.
Për të treguar mungesën e vullnetit të opozitës për zgjidhje, Bumçi kujton se PS nuk konsumoi asnjë instrument ligjor që do t’i hapte rrugë këtij procesi. Për deputetin demokrat, kjo s’është veçse strategjia e kryetarit të PS, Edi Rama për të shmangur vëmendjen nga zgjedhjet lokale të 2011, sikundër shmangu ballafaqimin e tij publik për probleme të Tiranës.
Me fillimin e sesionit të ri parlamentar pritet që Presidenti të dekretojë datën për zgjedhjet lokale bazuar në afatin kushtetues 9 muaj përpara përballjes elektorale. Në mbledhjen e parë të KQZ pas këtij moment, ky institucion do të duhet të konsiderojë dhe qëndrimin lidhur me kutitë e votimit.
Sipas Bumçit, KQZ-së nuk i mbetet veçse të zbatojë ligjin, duke ju referuar nenit 178 të Kodit, që flet për djegie të fletëve të votimit. Për Bumçi nisja e sesionit të ri parlamentar përkon me zhvillime të rëndësishme siç është vendimi për liberalizimin e vizave, njëkohësisht politika do të diskutojë buxhetin e ri 2011 si dhe do të përgatitet për zgjedhjet e reja lokale.