Fernando Gentilini përfaqësues i BE-së në Kosovë

Këshilli i BE-së ka marrë vendim për emërimin e Fernando Gentilinit në postin e përfaqësuesit Special të BE- së në Kosovë për një periudhë kalimtare.

Sipas gazetës kosovare Express  bëhet me dije se vendet anëtare të BE-së e kanë marrë këtë vendim me konsensus të plotë.

Diplomati italian do zëvendësojë holandezin Pieter Feith, i cili është përfaqësues Special i BE-së në Kosovë që nga shkurti i vitit 2008. Megjithatë, Feith do të vazhdojë punën në Kosovë edhe pas 30 prillit, por vetëm si Shef i Zyrës Civile Ndërkombëtare, pozitë në të cilën ka mandat të pakufizuar.

Brukseli ka vendosur që emisari i ri të ketë mandat vetëm tre mujor për shkak se shtetet anëtare ende nuk janë pajtuar rreth riorganizimit të pranisë europiane në Kosovë dhe nëse EUSR-ja do të shërbej edhe si Shef i ICOsë.

Deri në fund të korrikut të këtij viti, në BE shpresohet se do të ketë marrëveshje për rigrupimin e strukturave europiane në Kosovë dhe do të emërohet emisari me mandat të plotë.

Aktualisht, Fernando Gentilini është një nga këshilltarët për Ballkanin në Sekretariat të BE-së dhe është i përfshirë edhe në dialogun për çështje teknike mes Kosovës dhe Serbisë.

Ai ka punuar në Kosovë në vitin 2004 dhe 2005, si përfaqësues personal i Javier Solanës.

Gentilini ka filluar karrierën në shërbimin diplomatik të Italisë në vitin 1990. Ka punuar në Ambasadën italiane në Etiopi. Më vonë është dërguar në Misionin e përhershëm italian në Bruksel.

Para se të emërohet emisar i Solanës në Prishtinë, Gentilini ka qenë shef i Departamentit për Ballkanin në Ministrinë e Jashtme të Italisë.

Nga viti 2008 deri më 2010, ai ka shërbyer në Afganistan si Përfaqësues i Lartë Civil i NATO-s