Fitore historike

Kapiteni i Interit, Javier Zanetti lavdëroi “fitoren historike” që përfundoi serinë e Juventusit prej 49 ndeshjeve pa humbje në Serie A. Nerazzurrët mposhtën Bianconerët 2-1 të shtunën mbrëma në kuadër të xhiros së 11-të në Kampionatin italian duke ua shkaktuar humbjen e parë pas më tepër se një viti e gjysmë.

“Po, është fitore historike, mbi të gjitha nëse konsiderojmë fuqinë e kundërshtarit. E dinim se Juventus ishte i pamposhtur për një kohë të gjatë dhe me meritë kryeson në renditje”, deklaroi Zanetti.

“Ne kemi nisur një rrugë dhe ngadalë jemi duke shkuar në drejtimin e duhur. Erdhëm në Torino për të zhvilluar lojën tonë me krenari, zemër dhe përkushtim. Synojmë të bëhemi skuadër e madhe dhe besoj se po shkojmë në rrugën e duhur. Kemi skuadër të re që dëshiron të luftojë për Scudetto në fund të sezonit”, shtoi argjentinasi. Trajneri Andrea Stramaccioni befasoi shumëkënd me sistemin 3-4-3.

“Ne e përgatitëm këtë sistem dhe e dinim se nëse luajmë me tre sulmues do të kërkohet sakrificë nga mesfusha. Por, jemi të lumtur të bëjmë atë që kërkohet”, përfundoi Zanetti.