Flaka e Janarit 2010, një manifestim kulturor në Gjilan

Në qytetin e Gjilanit anë duke u bërë përgatitjet e fundit për edicionin e 19-të të manifestimit kulturor, i cili është kthyer në një traditë në këtë qytet Flaka e Janarit 2010. Ky aktivitet i cili i përket një konkursi letrar me temë të lirë është i hapur dhe në të mund të marrin pjesë krijuesit e të gjitha trojeve etnike shqiptare, me një apo më tepër punime, të pabotuara apo të papublikuara më parë. Nga organizatorët bëhet e ditur se materialet duhet të dërgohen

deri më 20 janar, ndërsa juria rezultatet do ti shpallë në faqen elektronike të Komunës së Gjilanit, më datë 25 janar. Në këtë aktivitet të madh priten performanca, shfaqje dhe koncerte që prekin artin skenik, pamor, muzikor dhe letrar. Përgatitjet për këtë aktivitet kanë filluar që nga shtatori i vitit 2009, Bordi Drejtues i Këshillit Organizativ  ka shpallur konkurs në artin letrar, për tregim të shkurtër dhe poezi, kategori të cilat do të japin  nga tri shpërblime. Në konkursin e artit pamor "Paneli i Flakës" do të jepen tri çmime që do të shkojnë për pikturën më të mirë, skulpturë dhe grafikën më të mirë, si dhe çmimi blerës për Fondin e Galerisë në vlerën e 500 eurove. Ekspozita "Peneli i Flakës XIX" do të hapet më 17 janar në ora 19:00 në Galerinë e Qytetit në Gjilan. Festivali i dramës fillon më 20 janar dhe zgjat deri më 25 janar. Në këtë festival kanë konfirmuar pjesëmarrjen e tyre trupa nga Shqipëria, Kosova dhe Maqedonia. "Drejt lirisë", është njëra nga shfaqjet  teatrore pjesëmarrëse në këtë festival të dramës shqipe. Pjesa është shkruar dhe interpretuar nga Erand Sojli. "Fest Flaka", koncerti i muzikës popullore, pritet të mbahet në Teatrin e Gjilanit më 26 janar.