Gati për Zvicrën

Përfaqësuesja zvicerane mund të pasurohet edhe më tej me futbollistë shqiptarë. Valon Behramit, Xherdan Shaqirit, Blerim Xhemajlit dhe Albert Bunjakut shumë shpejt mund t’u bashkohen edhe Granit Xhaka e Admir Mehmedi. Mesfushori i Baselit dhe sulmuesi i Zurichut pritet të ftohen nga helvetikët për ndeshjen e 4 qershorit ndaj Anglisë. Ata thonë se janë të gatshëm për Zvicrën. Nga Express më 27 maj 2011 në ora 11:27

Pas Valon Behramit, Xherdan Shaqirit, Blerim Xhemajlit dhe Albert Bunjakut, përfaqësueses së Zvicrës shumë shpejt pritet t’i bashkohen edhe dy lojtarë shqiptarë. Ata janë mesfushori i Baselit, Granit Xhaka dhe sulmuesi i Zurichut, Admir Mehmedi.

Mediat zvicerane shkruajnë se selektori Ottmar Hitzfeld, sipas të gjitha gjasave, do ta përfshijë në përfaqësuesen helvetike 18-vjeçarin e Baselit, në listën që do ta publikojë të premten, për ndeshjen kualifikuese për Euro 2012 ndaj Anglisë, më 4 qershor në stadiumin Wembley.

Xhaka pati një përparim të hatashëm. Ai debutoi me ekipin e Baselit në një moshë të pabesueshme – si 17 vjeç. Këtë sezon ai zhvilloi rreth 20 ndeshje me kampionin e ri të Zvicrës. Ai i mahniti të gjithë me kualitetin e tij të shfaqur në debutimin e tij në kampionatin zviceran.

Për këtë gjë, përfaqësuesi U21 i Zvicrës nuk arrin ende të besojë. “Unë vështirë se mund të besoj në këtë mundësi”, ka thënë futbollisti kosovar për uebfaqen 20 min.ch. Sidoqoftë, ai është i gatshëm në çdo moment, nëse merr një ftesë nga trajneri gjerman.

Mediat zvicerane shkruajnë se me gjasë, Xhaka do të heqë dorë nga Kampionati Evropian U21, i cili do të mbahet në Danimarkë, për t’iu bashkuar ekipit të parë të Zvicrës, në angazhimet që ka në kualifikime për Evropianin e Ukrainës dhe Polonisë.

Muaj më parë, Graniti e vazhdoi kontratën me Baselin, së bashku me vëllanë e tij, Taulantin, deri në vitin 2015. Ai e festoi të mërkurën mbrëma titullin e kampionit, me ç’rast konfirmoi se do ta lërë ekipin e tij, së paku edhe një vit. “Nuk dëshiroj të shkoj jashtë Zvicrës dhe ta ngroh bankinën. Nuk dua ta ndjek rrugën e Ben Khalifas”, tha Xhaka për tabloidin zviceran, Blick.

Futbollisti kosovar ishte shpallur kampion i botës me ekipin U17 të Zvicrës në vitin 2009. Për të, ky ishte sezoni i parë në ekipin e Baselit. Ndërkohë, shtypi zviceran shkruan se rrugën e Xhakës mund ta ndjekë edhe Admir Mehmedi. Pas pensionimit të dyshes sulmuese, Frei e Streller, dhe lëndimit të Bunjakut, rrugët e sulmuesit të Zurichut janë hapur.

Ai gjithashtu mund të ftohet për ndeshjen me Anglinë, e cila do të zhvillohet më 4 qershor. “Nëse grumbullohem, do të ishte një gjë e bukur për mua”, tha Mehmedi për 20min.ch. Selektori Ottmar Hitzfeld pritet ta publikojë listën e të ftuarve të premten, nga ora 11:00.