Gazeta Zëri: Disponojmë provat. Avokati i Shkëlzenit: 100 mijë euro është minimumi për të kompensuar dëmin moral

Gazeta Zëri dhe autori i shkrimit me titull Sali Berisha me mafinë serbe kundër Kosovës, Enis Veliu, vazhdojnë të qëndrojnë prapa lajmit, i cili akuzonte familjen e kryeministrit Sali Berisha se po favorizon biznesmenët serb duke i dhëne atyre tenderin për linjën e interkonjeksionit Shqipëri Kosovë, raporton Vizion Plus.

Gazetari Enis Veliu deklaron nëpërmjet telefonit se këtë çështje ia ka lënë gjykatës, dhe disponojnë fakte të mjaftueshme për të vërtetuar gjithçka që është shkruar në gazetë.

Nga ana tjetër avokatët e studios ligjore Sejdiu e Qerkini deklarojnë për Vizion Plus se ngritja e padisë civile është një e drejtë që i takon djalit të kryeministrit Sali Berisha, i cili kërkon nga gazeta Zëri të dëmshpërblehet për dëmin moral dhe të tërheqë nga ueb-i i saj lajmin. Sipas avokatit, shuma e kërkuar nga Shkëlzen Berisha prej 100 mijë eurosh është minimumi për të kompensuar dëmin moral. Ndërkohë Asosacioni i Gazetarëve Profesioniste të Kosovës nuk kanë preferuar të prononcohen duke ia lënë këtë çështje drejtësisë.