“Gërdeci”, nis më në fund procesiNga TemaKa nisur më në fund procesi gjyqësor ndaj të akuzuarve si përgjegjës për tragjedinë e 15 marsit në Gërdec. Për herë të parë, ditën e djeshme në Gjykatën e Shkallës së Parë në kryeqytet kanë qenë të pranishëm t

Nëse dëshironi të lexoni edicionin online të gazetës në PDF klikoni këtu.

Ka nisur më në fund procesi gjyqësor ndaj të akuzuarve si përgjegjës për tragjedinë e 15 marsit në Gërdec. Për herë të parë, ditën e djeshme në Gjykatën e Shkallës së Parë në kryeqytet kanë qenë të pranishëm të gjithë avokatët e 29 të pandehurve, çka ka bërë që seanca të zhvillohet normalisht. Gjatë seancës së djeshme, e cila ka zgjatur më shumë se një orë, avokatët e 25 të pandehurve, pjesa më e madhe e të cilëve ushtarakë, kanë kërkuar veçimin e dosjes, duke qenë se, sipas tyre, ata akuzohen për shpërdorim detyre dhe falsifikim, ndryshe nga Mihal Delijorgji dhe Ylli Pinari, që akuzohen për vrasje. Për këtë arsye, ata i kanë kërkuar trupit gjykues, që drejtohet nga ana e gjyqtarit Ridvan Hado, veçimin e dosjeve. Pasi ka dëgjuar kërkesat e avokatëve mbrojtës, trupi gjykues ka vendosur që ta shtyjë seancën për më 7 tetor, kur dhe do të vendosë, nëse do të pranojë kërkesat për veçimin e dosjeve të të pandehurve. Ndërkohë, mbrojtësi i të pandehurit Ylli Pinari, ka kërkuar nga ana e gjykatës që t’i zhvillojë seancat gjyqësore me dyer të mbyllura dhe pa praninë e medias, pasi, sipas tij, gjatë procesit mund të zbulohen sekrete shtetërore. Edhe për këtë kërkesë vendimi pritet që të merret gjatë seancës së ardhshme. Në sallën e gjyqit nuk kanë qenë të pranishëm të akuzuarit kryesorë, Mihal Delijorgji dhe Ylli Pinari, të cilët kanë vendosur që të përfaqësohen nga mbrojtësit e tyre. Kjo ishte seanca e gjashtë gjyqësore për 29 të pandehurit e dosjes penale për tragjedinë e Gërdecit, që prej dorëzimit nga ana e prokurorisë në gjykatë të dosjes me akuzat. Pesë seancat e mëparshme kanë dështuar për shkak të mungesës së avokatëve mbrojtës, gjë që në fakt mund të përsëritet edhe në seancat e ardhshme, duke qenë se numri i të pandehurve është mjaft i madh dhe për pasojë edhe i mbrojtësve të tyre. Mjafton që një prej tyre të mos jetë i pranishëm në sallën e gjyqit dhe seanca dështon. Ndërkohë, një prej të akuzuarve kryesorë për tragjedinë e 15 marsit, ish-ministri i Mbrojtjes, Fatmir Mediu, tashmë nuk është më zyrtarisht i akuzuar për këtë tragjedi. Gjykata e Lartë e pushoi dosjen ndaj tij, pas rifitimit të mandatit. Por, pavarësisht kësaj, familjarët e viktimave janë të vendosur që Mediu të gjykohet me patjetër për veprën që akuzohet. Pak ditë më parë ata u shprehën se do të ndërmarrin një sërë hapash për këtë gjë, si ri-kallëzimi i tij në prokurori, gjë që do të detyronte organin e akuzës të kërkonte sërish imunitetin e tij në Kuvend dhe dërgimin e ankesës në Gjykatën Kushtetuese. Nëse nuk do të kenë sukses me këto dy veprime, ata janë shprehur se dosjen e Mediut do ta çojnë në Gjykatën e Strasburgut. Edhe prokuroria duket se ka ndërmend që të kërkojë sërish imunitetin e Mediut, sapo vendimi për pushimin e dosjes së tij të jetë zbardhur nga ana e Gjykatës së Lartë.