Gjirokastër, Apeli lë në burg inspektorin e Bashkisë

Gjykata e Apelit e Gjirokastrës vendos të mos ndryshojë vendimin për masën e sigurisë ndaj inspektorit të bashkisë së Gjirokastrës të arrestuar si përgjegjës për tragjedinë e 9 janarit. Inspektori do të qëndrojë në burg deri në fund të hetimeve. 

GJIROKASTER- Lihet në qelitë e paraburgimit inspektori i ndërtimit në Bashkinë e Gjirokastrës i cili akuzohet si përgjegjës i tragjedisë së ndodhur më 9 nëntor në qytetin e gurtë. Nga shembja e pallatit pesëkatësh humbën jetën tre persona dhe u plagosën disa të tjerë.

Vendimi u mor sot nga Gjykata e Apelit në Gjirokastër e cila la në fuqi masën e sigurisë "arrest në burg" të marrë nga Gjykatës së Shkallës së Parë. Admir Shehaj, me detyrë përgjegjës në Inspektoriatin e Ndërtimit në bashkinë e Gjirokastrës, akuzohet për "shpërdorim detyre".

Nga hetimet e deritanishme është arritur në përfundimin se pallati 5 katësh i ngritur në një kodër në lagjen "11 Janari", u shemb për shkak të punimeve për ndërtimin e një godine të re, pranë tij. Deri tani për këtë ngjarje janë ndaluar dhjetë persona, nga këta dy shtetas u lanë në gjykohen në gjendje të lirë.

(s.g/BalkanWeb)