Gjirokastër, gjykata lë në burg Drini Alikon, akuzohet për vrasje

Shkalla e parë e gjyqësorit të Gjirokastrës, ka lënë në arrest me burg Drini Alikon, i arrestuar tri ditë më parë nga policia si i dyshuar në një ngjarje të ndodhur 10 vjet më parë me pasojë vrasjen. Kryesuesja e seancës së djeshme gjyqësore, Marsela Pepi ka vendosur që Aliko të qëndrojë me arrest në burg deri në momentin e gjykimit të çështjes duke u mbështetur tek argumentet e përcjella nga ana e organit të akuzës. Nga ana e vet prokuroria ka paraqitur provat që kushtëzonin mbajtjen në burg të Alikos deri në momentin e daljes së tij në gjyq. Ndërkohë, pala mbrojtëse ka kërkuar që Aliko të lirohej, pasi nuk është ai autori i vrasjes së Besnik Ibrahimit në nëntorin e vitit 1999 në lagjen Punëtori. Kjo është justifikuar nga mbrojtësit, pasi Drini Aliko ka qëndruar përgjatë dhjetë viteve të fundit në Gjirokastër duke qarkulluar si person i lirë dhe i pa ndjekur nga ana e organeve policore apo drejtësia. Drini Aliko është kapur nga Policia e Gjirokastrës tre ditë më parë, pasi rezulton të jetë një prej autorëve kryesorë të ekzekutimit me armë të Besnik Ibrahimit, gjatë një konflikti të armatosur.