Gjirokastër, të moshuarit rendin drejt letërnjoftimeve, shkak penalizimi

Pas shtrirjes së procesit të pajisjes së shtetasve me karta identiteti edhe në njësi të tjera të qeverisjes vendore në Qarkun e Gjirokastrës, numri i aplikantëve ka njohur rritje. Informacionet e marra pranë Institucionit të Prefektit bëjnë të ditur për gazetën se shifrat e personave që kanë aplikuar për tu pajisur me këto karta janë të konsiderueshme. Fluksin më të madh e ka Bashkia e Gjirokastrës, me 682 persona që kanë aplikuar nga 921 aplikantë në 4 njësi vendore në të tri rrethet e Qarkut ku ka nisur ky proces. Ndërkaq, në zyrat e vendosura në dispozicion për këtë qëllim në Bashkinë e Gjirokastrës, megjithë rritjen e numrit të personave që paraqiten, puna ka ecur normalisht. Nga të dhënat e kalkuluara disa javë më parë, në Bashkinë e Gjirokastrës ekzistojnë rreth 3100 persona çka përbëjnë rreth 1/8 e zgjedhësve, të cilët nuk janë të pajisur me pasaportë ndërkombëtare. Kjo kategori është e favorizuar për tu pajisur fillimisht me dokumentin e ri të identifikimit duke vazhduar më pas me personat e tjerë të cilët kanë pasaportë. Të dhënat e servirura, bëjnë të ditur se numri më i madh i aplikantëve është i moshave të treta dhe pak i të rinjve. Megjithë apelet e shumta të institucioneve në qendër për integrimin e njerëzve të jenë pjesë e këtij procesi, të rinjtë duket se janë më pak të predispozuar ndaj tij. Në Qarkun e Gjirokastrës janë rreth 17500 persona ose 1/6 e personave me të drejtë vote që nuk disponojnë pasaporta dhe që do të pajisen të parët me karta identiteti, për tju shmangur në këtë mënyrë sanksioneve ligjore.