Gjithqysh në Beograd
Tifozët tetovarë ‘Ballistët’ janë të zhgënjyer pasi të mërkurën e ardhshme nuk do të mund të udhëtojnë drejt Beogradit për ta përkrahur Shkëndijën në duel me Partizanin, në ndeshjen e parë të rrethit të dytë të kualifikimeve për Ligën e Kampionëve.
Dy përballjet mes kampionit maqedonas dhe atij serb, UEFA i konsideron si të rrezikut të lartë, sepse bëhet fjalë për një ‘betejë’ serbo-shqiptare. Për këtë përfaqësues të Federatës së Futbollit të Serbisë dhe Maqedonisë së bashku me drejtuesit e dy klubeve kanë rënë dakord të enjten që ‘Ballistët’ mos të udhëtojnë në Beograd e as ‘Grobari’ në Shkup.
Palët e kanë arritur këtë pajtueshmëri me qëllim që të shmangen ekseset e mundshme mes tifozëve shqiptarë dhe atyre serbë. Pjesë e këtij takimi ishin edhe zyrtarë të UEFA-s dhe të organeve të rendit nga Serbia e Maqedonia.
Mirëpo, kjo pajtueshmëri nuk u ka pëlqyer fare ‘Ballistëve’, të cilët veç ishin përgatitur për të udhëtuar drejt Beogradit në numër të madh.
“Është e vërtetë që të dyja klubet janë pajtuar që mos të udhëtojmë drejt Beogradit, por as ata të mos vijnë në Shkup. Normalisht që jemi të zhgënjyer, sepse këtë vendim e kanë marrë pa pëlqimin tonë”, deklaroi për Express njëri prej prijësve kryesor të ‘Ballistëve’, Shkëlzen Meta.
“Ne jemi përgatitur për të udhëtuar drejt Beogradit prej 700 deri në 1 mijë tifozë. I kemi kryer të gjitha përgatitjet për ta pasur një paraqitje shumë të mirë në Beograd, andaj jemi shumë të zhgënjyer me këtë vendim”, theksoi ai.
Megjithatë, ‘Ballistët’ duket se nuk e kanë ndërmend ta respektojnë pajtueshmërinë e palëve. Tifozët e njohur maqedonas insistojnë për të shkuar në Beograd të mërkurën e ardhshme.
“Megjithatë, ne do të shkojmë. Ne do të nisemi dhe çfarë do të ndodhë nuk e di. Por, ne do të nisemi”, tha Meta.
Pajtueshmëria mes palëve ishte arritur në kohën kur ‘Ballistët’ nëpërmjet një komunikate për opinion u kishte bërë thirrje shqiptarëve që tu bashkohen në rrugëtimin e tyre drejt Beogradit.
“Kënaqësitë e jetës lidhen me emocione, Shkëndija dhe Ballistet t’i garantojnë ato. A je Shqiptar? Çka pret? Na erdh vakti! Nisemi për në Beograd! Një ditë si kjo e ëndërruam me shekuj, e kujtuam gjatë, e pritëm me emocione drithëruese, me lot - tani e kemi, erdhi, bashkohu dhe bëhu pjesë e udhëtimit më të madh...”, thuhej në kumtesën e ‘Ballistëve’, të cilëve mezi nuk u pritej që midis Serbisë ta këndonin këngën ‘Besa-Besë’.
“Pse t’i mbyllim sytë në ditën kur kombi, Tetova, shkëndija dhe Ballistet- përfaqësohen nga një zë, nga zëri ynë, nga zëri që ruajti energji shekuj me radhë, për tu bë më i fuqishëm si kurrë, pikërisht në këtë ditë. Tani më koha erdhi, na mbetet neve të tregojmë se sa e mbajmë fjalën dhe se sa i qëndrojmë Besnik klubit që çdo ndeshje ja kemi kënduar: Himnin madhështorë ‘BESA BESË’...” thuhej pos tjerash në komunikatë, në të cilën ‘Ballistët’ u kishin premtuar bashkëkombëseve të tyre se do t’i prezantojnë shkëlqyeshëm në Beograd, në një garë të rëndësishme evropiane.