Gjurmët e gishtave lënë në burg hajdutin

Gjykata e Fierit ka lënë në burg autorin e vetëm të arrestuar për vjedhjen e ish-drejtorit të Uzinës së Përpunimit të Naftës Fier, Ilir Dulla. Mësohet se Edmond Avdo, i arrestuar për vjedhje në bashkëpunim të një shume të madhe valute në shtëpinë e ish-drejtorit të UPN-së është përballur dje me togat e zeza, të cilat kanë vendosur masën e vlerësimit të sigurisë për të. Gjykata ka vendosur që Avdo të qëndrojë në burg deri në përfundim të hetimeve, sikundër ka kërkuar Prokuroria e Fierit. Avdo akuzohet për vjedhje në bashkëpunim të 85 mijë eurove dhe 70 mijë dollarëve, por kjo sasi valute nuk i është gjetur atij në momentin e arrestimit. Prova kryesore ku mbështetet prokuroria janë gjurmët e gishtave të të arrestuarit, që janë gjetur në vendin e ngjarjes. Ndërkohë, policia është vënë në kërkim të personave të tjerë që kanë bashkëpunuar në këtë vjedhje, të cilët kanë me vete edhe pjesën më të madhe të parave të vjedhura.