Gol që s’harrohet
Për Fatos Beqirajn, e marta ka qenë njëra prej ditëve më të bukura në jetë. Sulmuesi kosovar e realizoi ëndrrën e tij të përjetshme – të luajë ndaj Real Madridit në stadiumin ‘Santiago Bernabeu’.
Por, sulmuesi pejan pati gëzim të dyfishtë. Përpos që luajti 90 minuta, ai arriti të shënojë ndaj klubit mbretëror spanjoll në minutën e 81-të, në humbjen 6:2 të ekipit të tij Dinamo Zagreb, në ndeshjen e vlefshme për xhiron e pestë të fazës së grupeve të Ligës së Kampionëve.
“Nuk mund të buzëqeshësh kur humb kësisoj. Mirëpo, ishte ndjenjë e bukur që shënova gol kundër Realit, në një stadium të tillë, me atmosferë fantastike. Sigurisht se atë gol do ta mbaj në mend gjithmonë, është gol që s’harrohet. Por, jam i mërzitur për shkak të rezultatit të përgjithshëm. Edhe pse, dihet se Reali është klub shumë i madh”, deklaroi sulmuesi kosovar për Express.
Ish futbollisti i Shqiponjës, Besës dhe Buduçnostit e pranon se madrilenët ishin dukshëm më të mirë dhe se fituan me meritë.
“Reali ishte shumë më i mirë, nuk mund të bësh më shumë ndaj një gjiganti evropian. Por, i pësuam shumë lehtë tre golat e parë. Nuk kemi mundur t’u bënim ballë spanjollëve, por kur në vazhdim të ndeshjes e kemi mbajtur pak topin, ka qenë shumë më mirë. Jam i zhgënjyer për rezultatin, , ndoshta e respektuam shumë kundërshtarin”, shtoi Beqiraj.
Fatosi ka folur edhe për ndërhyrjen e Lassana Diarras në dëm të tij. “Nuk ishte penallti, ishte jashtë 16 metërshit, por Diarra ishte lojtari i fundit kur ndërhyri ndaj meje dhe është dashur të ndëshkohej me karton të kuq”, përfundoi përfaqësuesi malazez.
Për Beqirajn, ky ishte goli i parë në një kompeticion të rëndësishëm siç është Liga e Kampionëve. Ai thotë se ndihet në formë të mirë dhe se do të mundohet të shënojë sërish në ndeshjet e ardhshme.