Grabitja e Intesa Sanpaolo Bank, shoqërohen 30 vetë
VLORË-Policia e Vlorës ka shoqëruar 30 persona të dyshuar se mund të kenë lidhje me ngjarjen e një dite më parë, kur persona të paidentifikuar grabitën filialin e “Intesa Sanpaolo Bank” në këtë qytet, duke përvetësuar vlera të konsiderueshme financiare. Zëdhënësi i policisë së qarkut të Vlorës, Saimir Koçiaj tha sot në një konferencë për shtyp se “është zbardhur skema e grabitjes, protagonistë të të cilës kanë qenë tre persona të cilët nën kërcënimin e armës kanë hyrë në mjediset e bankës, duke marrë prej saj vlera të konsiderueshme financiare”. Sipas Koçiajt, autorët janë larguar me shpejtësi nga vendi i ngjarjes me një automjet tip Benz 270, të cilin e kanë braktisur në periferi të qytetit të Vlorës, në afërsi të Shkollës së Marinës, duke i vënë zjarrin. Koçiaj tha se hetimet e policisë për zbardhjen e ngjarjes janë intensifikuar dhe për rrjedhojë janë shoqëruar e marrë në pyetje 30 persona që dyshohet të kenë lidhje me të. Zëdhënësi i policisë së qarkut të Vlorës i bëri thirrje komunitetit të bashkëpunojë për zbardhjen e ngjarjes, duke u shprehur se “policia ka vënë në dispozicion 30 mijë euro për çdo informacion të vlefshëm që mund të çojë në identifikimin dhe kapjen e autorëve”.
Mesditën e djeshme, tre persona të maskuar dhe të armatosur hynë në mjediset e filialit të bankës “Intesa Sanpaolo” në lagjen “Pavarësia”, në Vlorë, duke marrë një shumë të konsiderueshme financiare, që nuk saktësohet nga policia. (m.a/BalkanWeb)