Greqi, parlamenti miraton buxhetin për 2010-ën

Parlamenti grek ka miratuar buxhetin e shtetit për vitin 2010, i cili shënoi një reduktim të deficitit publik. Teksti i hartuar nga qeveria u miratua nga 160 deputetët socialistë të PASOK-ut, të ardhur në pushtet që prej muajit tetor.
Deputetët e Partisë Konservatore, Komuniste, të Majtës Radikale dhe Ekstremit të Djathtë, votuan kundër. Ky votim u zhvillua në një moment kur Greqia prej disa muajsh po përballet me një krizë financiare të pazakontë. Parlamenti i Greqisë miratoi me votat e socialistëve buxhetin e vendit për vitin e ardhshëm, që konsiderohet si hapi i parë drejt daljes nga kriza e thellë ekonomike. Buxheti parashikon uljen e deficititi buxhetor gjatë vitit 2010 nga 12,7 në 9,1 për qind dhe sipas ekspertëve kjo duhet të arrihet në radhë të parë me masa për parandalimin e mashtrimeve me tatime, uljen e shpenzimeve për sektorin publik dhe uljen e buxhetit për mbrojtje. Kryeministri socialist Jorgos Papandreu e quajti këtë buxhet si hapin e parë për kthimin e besueshmërisë në vend. Greqia aktualisht po përballet me borxhet rekorde në vlerë prej rreth 300 miliardë euro. Bashkimi Europian ka bërë të ditur se me shqetësim po i përcjell zhvilimet në këtë vend i cili i takon zonës së euros. Javën e kaluar komisioni Europian përshëndeti planin e paraqitur nga kryeministri grek Jorgos Papandreu për rimëkëmbjen e ekonomisë. Papandreu njoftoi së fundmi një plan për rimëkëmbjen ekonomike me objektiv qetësimin e partnerëve europianë. Si masa emergjente për rimëkëmbjen e financave të shtetit Papandreu paralajmëroi shkurtimin e shpenzimeve për sigurimin shoqëror, përcaktimin e tavanit të sipërm për rrogat më të larta në sektorin publik dhe ndalimin e punësimeve të reja në këtë sektor. Veç kësaj Papandreu synon dhënien e impulseve pozitive me anë të privatizimeve dhe duke mbështetur teknologjinë për mjedisin. Sistemi i vjetëruar i pensioneve do të ristrukturohet përmes shkrirjeve të arkave të pensioneve. Do të luftohen më me forcë korrupsioni, nepotizmi dhe evazioni fiskal, do të hiqen shpërblimet në sektorin bankar shtetëror.