Gripi i derrave, humb jetën 37-vjeçari shqiptar në Napoli

 

Një 37-vjeçar shqiptar ka gjetur vdekjen nga gripi i derrave në spitalin Mondali të Napolit në Itali. Sipas strukturave shëndetësore italiane, shqiptari, emri i të cilit nuk behët publik, vuante nga një sërë sëmundjesh dhe ç’rregullimesh në organizëm. “Ai ndodhej në reanimacion qysh prej datës 6 nëntor, i mbërritur prej një spitali periferik të Napolit pas përkeqësimit të gjendjes shëndetësore”, sqaruan autoritetet italiane. Ndërkaq dy ditë më parë, numri zyrtar i personave të raportuar me AH1N1 në vendin tonë arriti në 121 raste. Ndonëse Ministria e Shëndetësisë nuk do të raportojë me të prekurit e rinj, burime pranë saj konfirmojnë se çdo ditë nga mnostrat e marra janë rreth 10-20 raste të reja me grip derrash.  Institucionet shëndetësore janë duke marrë informacionin e nevojshëm nga të gjitha shkollat e vendit, në mënyrë që situata gripale të mbahet nën kontroll. Nga të dhënat e Ministrisë së Shëndetësisë, 10-15 për qind e rasteve me gripin stinor kanë pasur infeksione të rrugëve të frymëmarrjes. Institucionet shëndetësore po përballen me një situatë gripale, e cila ishte parashikuar për periudhën dhjetor-janar. “Edhe virusi i gripit të zakonshëm këtë vit ka shënuar një numër më të lartë të prekurish”, sqarojnë mjekët. Ata bëjnë apel për kryerjen e vaksinës kundër gripit të zakonshëm brenda muajit nëntor. Kjo këshillë vjen sidomos për grupet në rrisk, ku të sëmurët kronikë, fëmijët dhe të moshuarit mbeten kryesorët.