Gruaja tenton vetëvrasjen, pranga burrit

Vlorë-Një 36-vjeçar nga Vlora është arrestuar nga policia, pasi akzuohet si shkaktar i tentativës vetëvrasëse të gruas. Ai e kishte keqtrajtuar gruan sistematikisht, derisa gjendja në familje, ka precipituar në vetëvrasje. Sipas policisë, një 38-vjecare me banim në zonën pranë ish-fabrikës së çimentos, është dërguar me urgjencë në spitalin e Vlorës. Mjekët konstatuan se ajo kishte një plagë të thellë thike në pjesën e barkut, çka ka dëmtuar edhe organet e saj. Edhe ardhja e gruas ka stepur bluzat e bardha. Mësohet të ketë qenë një fqinj që e ka lënë pranë tyre e ka ikur menjëherë, pa dhënë më tepër shpjegime. Ka qenë vetë gruaja që ka dhënë shpjegime më pas se ka marrë thikën për të shkaktuar vetëvrasjen. Nëna e tre fëmijëve ka shpjeguar se shkak ka qenë konflikti me bashkëshortin e saj. Siç bën me dije policia, 36 vjeçari e ka keqtrajtuar gruan sistematikisht e në mënyrë të vazhdueshme, duke e detyruar të tentojë të vrasë veten me thikë duke shkaktuar plagë të rënda. Duke vlerësuar situatën dhe pyetjen e të njohurve të tjerë, policia ka vënë në pranga 36 vjeçarin, i cili akuzohet për veprën penale te shkaktimit të vetëvrasjes. Sipas burimeve te policisë, gjatë deponimeve të tij, burri ka shfaqur shenja të një shëndeti jo të qëndrueshëm mendor.