Hague për vizitë në Siri

Sekretari i Jashtëm britanik, William Hague ka mbërritur në kryeqytetin sirian Damask në kuadër të një vizite zyrtare.

Hague u takua me presidentin e Sirisë, Bashar Al Assad dhe sekretarin e jashtëm Walid Moualem.

Vizita vjen në kohën kur janë rritur tendosjet në Libanin fqinj, lidhur me qeverinë e bashkimit, pasi Hezbollah u tërhoq nga qeveria në fillim të muajit.

Kjo është e para vizitë e këtij niveli të lartë nga një ministër britanik, që kur qeveria e koalicionit erdhi në fuqi në Britani vitin e kaluar.

Nën qeverinë laburiste ka pasur vizita, por jo të nivelit të lartë tek qeveria siriane dikur e izoluar.

Por tani Britania, si shumë vende të tjera, përfshirë edhe Shtetet e Bashkuara duan të jenë të angazhuara me Sirinë.

Procesi i paqes në Lindjen e Mesme ishte një prej çështjeve kryesore që u diskutuan.
Por është situata në Liban ajo që përbën shqetësim.

Britania kërkon nga Siria që të ndihmojë për të stabilizuar Libanin, përmes ndikimit që ka mbi grupin militant shiit Hezbullah.