Harbuzi në Manisaspor

Të paktën edhe gjashtë muaj, Labinot Harbuzi do të luajë në elitën e futbollit të Turqisë. Në fakt, pas ndarjes së parakohshme me Genclerbirligin në muajin dhjetor, mesfushori kosovar pati thënë se karrierën synon ta vazhdojë në Itali apo në Spanjë.

Por, këtë objektiv Harbuzi ndoshta do të mund ta arrijë vetëm gjatë afatit kalimtar të verës, pasi deri atëherë do t’i mbrojë ngjyrat e ekipit turk Manisaspor.

Lajmi është konfirmuar të mërkurën edhe në ueb faqen zyrtare të Manisaspor, menjëherë pasi prishtinasi me sukses i ka kryer të gjitha testet e nevojshme mjekësore. Në njoftimin e klubit turk thuhet se Manisaspor ka arritur një marrëveshje afatshkurtër me Harbuzin, i cili do ta bartë fanellën e këtij ekipi deri në fund të këtij sezoni.

Deri në vitin 2009, 25 vjeçari ishte pjesë e ekipit suedez Malmo, prej të cilit u pat transferuar te Genclerbirligi, ku lëndimet e shpeshta ia pamundësonin t’i tregonte vlerat.

Aktualisht, skuadra e re e Harbuzit, Manisaspor pozicionohet në vendin e dymbëdhjetë të renditjes tabelore me 26 pikë të tubuara, 21 më pak sesa kryesuesi Galatasaray.