Haxhinasto:Me rëndësi, reforma zgjedhore

Zv.kryeministri, njëherësh dhe Ministri i Jashtëm i vendit, Edmond Haxhinasto, gjatë fjalës së tij të mbajtur në Samitin e Dubrovnikut, në Kroaci, ka deklaruar se rajoni ka bërë ndryshime progresive.
 

 Zv.kryeministri është ndalur edhe në zhvillimet e fundit politike në vend, duke theksuar se zgjedhjet lokale janë me rëndësi për reformat zgjedhore. "Shqipëria ka bërë progres të gjithanshëm dhe vijon kontributin e saj për stabilitetin në rajon", është shprehur ai. Ndër të tjera, Haxhinasto ka theksuar në këtë drejtim, se rajoni po lëviz në drejtimin e duhur dhe se bashkëpunimi rajonal shtrihet në doganë, arsim dhe lëvizjen me ID.
 

Ministri i Jashtëm shqiptar, gjithashtu është ndaluar edhe në integrimin e rajonit, duke e cilësuar atë një ndër prioritetet më të rëndësishme në axhendën e Bashkimit Evropian. Në datat 8-9 korrik 2011, zv.kryeministri dhe Ministri i Punëve të Jashtme, Haxhinasto, po merr pjesë në Samitin e 6-të të Kroacisë, me temë "Dekada e Re për Evropën Juglindore - Finalizimi i Tranzicionit", i cili zhvillohet në Dubrovnik të Kroacisë. Në Samitin e këtij viti do të diskutohet për përcaktimin e parimeve ekonomike, me theks rolin e investimeve, sfidat e sigurisë të lidhura me ndryshimet politike dhe sociale në Mesdhe dhe vazhdimin e procesit të zgjerimit të Bashkimit Evropian për vendet e Evropës Juglindore. Ky Samit i përvitshëm, shërben si një forum dialogu mes kryeministrave, ministrave dhe të ftuarve të nderuar nga Evropa dhe Amerika e Veriutm i fokusuar krysesisht në çështje të integrimit të Evropës Juglindore në strukturat evropiane dhe transatlantike.