Hitzfeld kërkon fitore ndaj Shqipërisë

Përfaqësuesja e Zvicrës kërkon fitore në dy sfidat e para kualifikuese për botërorin ‘Brazili 2014’ ndaj Sllovenisë më 7 shtator dhe ndaj Kombëtares së Shqipërisë, më 11 shtator.

Selektori Ottmar Hitzfeld, i cili e publikoi listën e të ftuarve të enjten, përfshirë këtu edhe pesë futbollistët shqiptarë: Valon Behrami, Blerim Xhemajli, Admir Mehmedi, Xherdan Shaqiri e Granit Xhaka, synon që nga këto dy sfida të dalë i pamposhtur.

“Nëse ndaj Shqipërisë dhe Sllovenisë i grumbullojmë katër pikë, do të ishte një rezultat i mirë për ne. Mirëpo, ne i kërkojmë dy fitore nga këto përballje”, ka thënë trajneri gjerman për mediat zvicerane pasi e publikoi listën.

Synim i zviceranëve është të kualifikohen në Botërorin e ardhshëm, pasi dështuan ta bënin një gjë të tillë në Evropianin 2012. Krahas Zvicrës e Shqipërisë, në Grupin E të eliminatoreve për evenimentin më të rëndësishëm të futbollit do të bëjnë pjesë edhe Norvegjia, Sllovenia, Islanda dhe Qiproja.