"Ikën" Henry Allingam, njeriu më i moçëm dhe veterani i luftës

Veterani i Luftës së Parë Botërore, që ishte njëherazi edhe njeriu më i moshuar në botë, ka ndërruar jetë në moshën 113- vjeçare. Henry Allingham ka vdekur në gjumë të shtunën, në shtëpinë e pleqve në Brajton, pas një jete të gjatë e me shumë peripeci. Ai ishte dhe një nga veteranët e fundit, ende gjallë të Luftës së Parë Botërore. Britaniku kishte hyrë në qershor në Librin e Rekordeve "Guinness", si njeriu më i moçëm në botë, pas vdekjes së "kundërshtarit" të tij, japonezit Tomoji Tanabe, që vdiq gjithashtu në moshën 113-vjeçare në Japoni. Kur e pyesnin se kujt ia atribuonte jetëgjatësinë, ai me shaka përgjigjej: uiskit, femrave dhe cigareve. Ai ishte shndërruar në një prej personave më prezentë në të gjithë përvjetorët përkujtimorë të Luftës së Parë Botërore. Ai është shprehur se, kur u regjistrua për të shkuar në luftë, nuk e kuptonte mirë realitetin, por kur përvoja e hidhur mori fund, ai u shndërrua në një njeri entuziast për paqen. Ai jetoi me bashkëshorten e tij Dorothy për 50 vjet dhe arriti të shohë dhe përkëdhelë stër-stër-stërnipat e tij. Pas lufte punoi në industrinë e makinave. Ai është gjithashtu fituesi i disa çmimeve e medaljeve të luftës e trimërisë jo vetën brenda Britanisë së Madhe. Që nga viti 2006 kishte humbur shikimin, por kurrë mendjen dhe memorien për të cilat ka qenë gjithmonë krenar.